સુરેન્દ્રનગર જિલ્લાના મૂળી તાલુકાના આંબરડી ગામે આ વર્ષે દિવાળીનો તહેવાર અસલ અર્થમાં પ્રકાશ અને ખુશીઓ લઈને આવ્યો છે. ગત વર્ષે કળદાકાંડ અને અન્ય વિવાદોના કારણે ગામના ખેડૂતો જેલમાં બંધ હોવાથી આખો આંબરડી ગામ શોકના માહોલમાં ડૂબેલો હતો અને દિવાળીના પર્વ પર કોઈ દીવા પણ પ્રગટી શક્યા ન હતા. પરંતુ કાયદાકીય લડત અને સંઘર્ષ બાદ આ વર્ષે ખેડૂતોની જેલમુક્તિ થતાં સમગ્ર ગામમાં ફરીથી દિવાળીનો ઉત્સાહ અને રોશની જોવા મળી છે, જેના કારણે ગ્રામજનોના ચહેરા પર વર્ષો પછી સાચી ખુશી ઝળકી ઉઠી હતી.
આ ભાવનાત્મક અને રાહતજનક માહોલ વચ્ચે ખેડૂત આગેવાન રાજુ કરપડા સીધા દિવાળીના પવિત્ર દિવસે જ આંબરડી ગામના ખેડૂત પરિવારોને મળવા માટે ખાસ ઉપસ્થિત રહ્યા હતા. તેમની સાથે આજુબાજુના ગામોના અનેક ખેડૂત આગેવાનો પણ મોટી સંખ્યામાં જોડાયા હતા, જેમણે ગામમાં પહોંચીને નાના બાળકો સાથે મુલાકાત કરી તેમને મીઠાઈ ખવડાવીને દિવાળીની ખુશીઓ વહેંચી હતી તેમજ ગામના વડીલોના આશીર્વાદ લીધા હતા. આ મુલાકાત દરમિયાન ખેડૂત આગેવાનોએ વિહળ બાપુ રાબા સહિત ૧૨ ભયબંધની ઐતિહાસિક જગ્યાએ જઈને દર્શન કર્યા હતા અને પોતાની માનતા પૂર્ણ કરી હતી, જેણે આ ઉજવણીમાં આધ્યાત્મિક અનેસંદેશો ઉમેર્યો હતો.
આનંદ અને ઉલ્લાસના આ માહોલ વચ્ચે ગામના આગેવાનો અને ખેડૂતો વચ્ચે એક મહત્વપૂર્ણ બેઠક પણ યોજાઈ હતી, જેમાં ગામના સ્થાનિક પ્રશ્નો, સિંચાઈના પાણીની સમસ્યા અને જળાશયોની વર્તમાન સ્થિતિ અંગે ગંભીર ચર્ચા કરવામાં આવી હતી. બે વર્ષના લાંબા સંઘર્ષ અને વિકટ પરિસ્થિતિઓનો સામનો કર્યા બાદ ખેડૂતો આજે પોતાના પરિવાર સાથે સ્વતંત્રતાપૂર્વક અને ખુશીથી દિવાળી મનાવી શકતા હોવાથી સમગ્ર સુરેન્દ્રનગર પંથકમાં આનંદની લહેર છવાઈ ગઈ છે.
