મોસ્કો સ્થિત રશિયન રક્ષા મંત્રાલયે રવિવારે જણાવ્યું હતું કે તેમના દળોએ કાળા સમુદ્રના કિનારે આવેલા યુક્રેનના મહત્વપૂર્ણ બંદરો પર મોટી સૈન્ય કાર્યવાહી કરી છે. આ કાર્યવાહી દરમિયાન ઓડેસા અને ચોર્નોમોસ્ક બંદર પર યુક્રેન માટે હથિયારો અને લશ્કરી સાધનો પહોંચાડતા કન્ટેનર જહાજો તેમજ ડ્રાય કાર્ગો શિપને સીધા નિશાન બનાવવામાં આવ્યા હતા. રશિયાનો દાવો છે કે આ જહાજો દ્વારા યુક્રેનની સેનાને ડ્યુઅલ-યુઝ અને સૈન્ય ઉપયોગી માલસામાનની સપ્લાય કરવામાં આવી રહી હતી, જેને સેનાએ સચોટ હુમલાથી નષ્ટ કરી દીધી છે. જોકે, રશિયાના આ દાવાઓની તટસ્થ સ્વતંત્ર એજન્સીઓ દ્વારા પુષ્ટિ થઈ શકી નથી અને યુક્રેન તરફથી પણ આ અંગે કોઈ તાત્કાલિક પ્રતિક્રિયા આપવામાં આવી નથી.
આ સૈન્ય અભિયાન માત્ર દરિયાઈ સીમા પૂરતું મર્યાદિત નહોતું, પરંતુ રશિયાએ યુક્રેનના આંતરિક વિસ્તારોમાં પણ ઉર્જા માળખા પર તીવ્ર પ્રહારો કર્યા હતા. રક્ષા મંત્રાલયના જણાવ્યા અનુસાર, યુક્રેનના નીપ્રોપેત્રોવ્સ્ક અને ઝાયટોમિર પ્રદેશમાં આવેલા બે મુખ્ય પાવર સબસ્ટેશન પર પણ હુમલા કરવામાં આવ્યા છે. રશિયાનું માનવું છે કે આ બંને સબસ્ટેશનો યુક્રેનના રક્ષણાત્મક અને લશ્કરી-ઔદ્યોગિક એકમોને વીજ પુરવઠો પૂરો પાડતા હતા, જેના કારણે તેમને અક્ષમ કરવા અત્યંત આવશ્યક હતા. આ હુમલાઓને કારણે યુક્રેનની સંરક્ષણ ક્ષમતાને ગંભીર ફટકો પડ્યો હોવાનું મનાઈ રહ્યું છે.
આ ભીષણ હુમલાઓની સીધી અસર યુક્રેનના સામાન્ય નાગરિકોના જનજીવન પર પડી છે. યુક્રેનની અગ્રણી પાવર કંપની 'ડીટીઈકે' (DTEK) દ્વારા ટેલિગ્રામ પર આપવામાં આવેલી માહિતી મુજબ, નીપ્રોપેત્રોવ્સ્ક પ્રદેશમાં ઉર્જા સુવિધાઓ પર થયેલા આ રાત્રિ હુમલાના કારણે ૬,૦૦,૦૦થી વધુ લોકો વીજળી વગર અંધારામાં રહેવા મજબૂર બન્યા છે. મહત્વપૂર્ણ ઉર્જા ઇન્ફ્રાસ્ટ્રક્ચર ક્ષતિગ્રસ્ત થવાથી સમગ્ર વિસ્તારમાં હાહાકાર મચી ગયો છે અને યુદ્ધની આ વિષમ પરિસ્થિતિ વચ્ચે સામાન્ય જનતા માટે મુશ્કેલીઓ અનેકગણી વધી ગઈ છે.
