દિલ્હી ખાતે કોંગ્રેસ અધ્યક્ષ મલ્લિકાર્જુન ખડગેના નિવાસસ્થાને યોજાયેલી આ વિશેષ મોક પાર્લામેન્ટનું વાતાવરણ અસલ સંસદના સેન્ટ્રલ હોલ જેવું પ્રભાવશાળી રહ્યું હતું. લોકસભાના પ્રથમ મહિલા અધ્યક્ષ રહી ચૂકેલા ૮૧ વર્ષીય મીરા કુમારે જૂની સંસદની યાદો તાજી કરાવતા ગૃહનું સંચાલન કર્યું હતું. જોકે, શરૂઆતમાં માઈક બંધ હોવાને કારણે સત્રની શરૂઆત થોડી અવ્યવસ્થિત રહી હતી, પરંતુ તકનીકી ખામી તાત્કાલિક સુધારી લેવાયા બાદ તેમણે પોતાના આગવા અને હૂંફાળા અંદાજમાં સત્રની કાર્યવાહી આગળ વધારી હતી. આ બેઠકમાં મુખ્ય ચૂંટણી કમિશનર જ્ઞાનેશ કુમાર વિરુદ્ધ દેશના ચૂંટણી તંત્ર સાથે ચેડાં કરવાના ગંભીર આરોપો સાથે ‘મહાભિયોગ’ પ્રસ્તાવ લાવવામાં આવ્યો હતો.
કાર્યવાહી દરમિયાન મીરા કુમારની જૂની શૈલી અને સખ્તાઈ યથાવત જોવા મળી હતી. તેમણે પોતાના જાણીતા અંદાજમાં "જલ્દી ખતમ કીજીયે" અને "બહુત ધન્યવાદ" કહીને સમય મર્યાદાનું પાલન કરાવ્યું હતું. સમયમર્યાદા ઓળંગનારા નેતાઓને "કૃપા કરકે બેਠ જાઈએ" કહીને સ્નેહપૂર્વક કાબૂમાં રાખ્યા હતા. મલ્લિકાર્જુન ખડગે, શિવસેના (યુબીટી)ના અરવિંદ સાવંત અને ટીએમસી સાંસદ મહુઆ મોઇત્રા સહિતના નેતાઓએ પોતાના વક્તવ્યમાં ચૂંટણી પ્રક્રિયાની પારદર્શિતા સામે ગંભીર સવાલો ઉઠાવ્યા હતા. મીરા કુમારે તેમના પ્રભાવશાળી સંબોધનમાં ભારતીય લોકશાહીને વડના વૃક્ષ સાથે સરખાવતા જણાવ્યું હતું કે મતદાર એ લોકશાહીનો આત્મા છે અને જો તેમાં દૂષણો પ્રવેશે તો લોકશાહી ઘાયલ થાય છે.
આ સમગ્ર આયોજનનું એક વિશેષ આકર્ષણ એ હતું કે મીરા કુમારે જે ખુરશી પર બેસીને કાર્યવાહી સંભાળી હતી, તે દેશના પ્રથમ વડાપ્રધાન પંડોિત જવાહરલાલ નેહરુની હતી. કૉંગ્રેસના નેતાઓએ આ ઐતિહાસિક ખુરશીના મહત્વને રેખાંકિત કર્યું હતું. સત્રના અંતે તમામ સાંસદોની સર્વાનુમતી જોઈને મીરા કુમારે આશ્ચર્ય વ્યક્ત કર્યું હતું કે પાંચ વર્ષ સુધી સ્પીકર તરીકે સેવા આપ્યા બાદ તેમણે ક્યારેય વિરોધ વિનાનું આવું એકસૂર ગૃહ જોયું ન હતું. તેમના ચહેરા પરની એ જ જાણીતી સ્મિત અને મક્કમ શિસ્ત સાથે આ મોક પાર્લામેન્ટનું સફળ સમાપન થયું હતું.
