ઉત્તર પ્રદેશના રામપુર જિલ્લા જેલમાંથી મુક્ત થવાના માત્ર થોડીક જ મિનિટો બાદ ૭૮ વર્ષીય પૂર્વ મંત્રી અને સપાના દિગ્ગજ નેતા આઝમ ખાન પર કાયદાનો ગાળો વધુ કસાયો છે. EDની લખનૌ ઝોનલ ઓફિસના અધિકારીઓએ કથિત ડ્યુઅલ પાન કાર્ડ કેસમાં હાઇકોર્ટે રાહત આપ્યાના બે દિવસ બાદ જ તેમની ધરપકડ કરી છે. આ કાર્યવાહી રામપુર સ્થિત મોહમ્મદ અલી જોહ્ર ટ્રસ્ટ અને મોહમ્મદ અલી જોહ્ર યુનિવર્સિટી સાથે જોડાયેલા નાણાકીય અનિયમિતતાના ગંભીર કેસોની ચાલી રહેલી મની લોન્ડરિંગ તપાસના ભાગરૂપે કરવામાં આવી છે.
અગાઉ, અલ્લાહાબાદ હાઇકોર્ટે આઝમ ખાન અને તેમના પુત્ર અબ્દુલ્લા આઝમ ખાનને ડ્યુઅલ પાન કાર્ડના કેસમાં સજા પર રોક લગાવીને જામીન મંજૂર કર્યા હતા, જેના કારણે તેમના જેલ મુક્તિનો રસ્તો સાફ થયો હતો. જો કે, આ કાનૂની રાહત ED દ્વારા મની લોન્ડરિંગ એક્ટ (PMLA) હેઠળ ચલાવવામાં આવી રહેલી અલગ તપાસને લાગુ પડતી ન હતી, જેના કારણે કેન્દ્રીય એજન્સીએ જેલની બહાર જ આ મોટી કાર્યવાહી કરી હતી. સૂત્રોના જણાવ્યા અનુસાર, એજન્સી હવે આઝમ ખાનને વિશેષ PMLA કોર્ટમાં રજૂ કરીને સઘન પૂછપરછ માટે રિમાન્ડની માંગણી કરશે.
આ ધરપકડ પહેલાં, EDએ મની લોન્ડરિંગ વિરોધી કાયદા હેઠળ મોટી કાર્યવાહી કરતા મોહમ્મદ અલી જોહ્ર યુનિવર્સિટીની જમીન અને ઇમારતોને અસ્થાયી રૂપે જપ્ત કરી લીધી હતી. જપ્ત કરાયેલી આ સંપત્તિઓની વર્તમાન બજાર કિંમત આશરે ૧,૧૭૦ કરોડ રૂપિયા હોવાનું અનુમાન છે, જ્યારે ચોપડે તેની કિંમત ૪૨૬.૪૬ કરોડ રૂપિયા આંકવામાં આવી છે. આઝમ ખાન સામેની આ કડક કાર્યવાહીથી રાજકીય વર્તુળોમાં ભારે ચર્ચા જાગી છે અને મામલો આગામી દિવસોમાં વધુ ગરમાઈ શકે છે.
