દિલ્હીના રાજકારણમાં આગામી સમયમાં ભારે હલચલ જોવા મળી શકે છે કારણ કે લોકસભામાં વિપક્ષના નેતા રાહુલ ગાંધીએ શનિવારે સોશિયલ મીડિયા પ્લેટફોર્મ 'એક્સ' પર એક પોસ્ટ શેર કરીને લોકોને રવિવારે યોજાનારી પદયાત્રામાં જોડાવા માટે ખુલ્લું આમંત્રણ આપ્યું છે. ઈન્ડિયા ગઠબંધન દ્વારા આગામી પહેલી નવેમ્બરે રામલીલા મેદાન ખાતે એક વિશાળ રેલીનું આયોજન કરવામાં આવ્યું છે, જેના સમર્થનમાં આ માર્ચ કાઢવામાં આવી રહી છે. રાહુલ ગાંધીએ પોતાના સંદેશમાં 'ચાલો આપણે સાથે મળીને ચાલીએ' (Let's walk together)નો નારો આપીને રવિવારે બપોરે ૧૨ વાગ્યે કોનોટ પ્લેસ નજીક આવેલા મિન્ટો રોડ જંક્શનથી આ પદયાત્રા શરૂ થવાની જાહેરાત કરી છે, જે અજમેરી ગેટ થઈને રામલીલા મેદાન પર સમાપ્ત થશે.
બીજી બાજુ, રાહુલ ગાંધીના આ આહ્વાન બાદ દિલ્હી પોલીસ અને વહીવટી તંત્ર સફાળું જાગ્યું છે. દિલ્હી પોલીસના સૂત્રોના જણાવ્યા અનુસાર, કોનોટ પ્લેસથી શરૂ થનારી આ પ્રસ્તાવિત પદયાત્રા માટે પોલીસ પાસે કોઈપણ પ્રકારની પરવાનગી માંગવામાં આવી નથી. પોલીસે સ્પષ્ટ કર્યું છે કે જો કે નેતાઓ અને સાંસદો પોતાના ખાનગી વાહનોમાં મુસાફરી કરવા માટે મુક્ત છે, પરંતુ હાલ સમગ્ર નવી દિલ્હી વિસ્તારમાં કલમ ૧૬૩ લાગુ કરવામાં આવી છે, જે કોઈપણ પ્રકારના મોટા મેળાવડા કે પ્રદર્શનો પર પ્રતિબંધ મૂકે છે. અગાઉ વિરોધ પ્રદર્શનો માટે જાણીતું જંતર-મંતર પણ હવે વિરોધ સ્થળ તરીકે સૂચિત નથી રહ્યું. આ સ્થિતિને ધ્યાનમાં રાખીને રામલીલા મેદાન પર યોજાનારી રેલી માટે પોલીસ અને અર્ધલશ્કરી દળોના જવાનોનો મોટો કાફલો તૈનાત કરવામાં આવ્યો છે.
આ રાજકીય ગરમાગરમી વચ્ચે વિપક્ષી ગઠબંધન દ્વારા મુખ્ય ચૂંટણી કમિશનર જ્ઞાનેશ કુમાર વિરુદ્ધ પ્રસ્તાવિત મહાભિયોગ મુદ્દે પણ વિશેષ કાર્યક્રમનું આયોજન કરવામાં આવ્યું છે. અગાઉ ભારે વરસાદને કારણે આ કાર્યક્રમ સ્થગિત કરવામાં આવ્યો હતો, જે હવે કોંગ્રેસ અધ્યક્ષ મલ્લિકાર્જુન ખડગેના નિવાસ્થાને યોજાનાર છે. રાહુલ ગાંધીએ કેન્દ્ર સરકાર અને ચૂંટણી પંચ પર ભારતીય લોકશાહીના ધોવાણનો ગંભીર આરોપ લગાવ્યો છે અને કેન્દ્રીય ગૃહમંત્રી અમિત શાહ પર ઉત્તર પ્રદેશ, બિહાર, મધ્યપ્રદેશ સહિતના રાજ્યોમાંથી દિલ્હી આવતા વિપક્ષી સમર્થકો અને સામાન્ય નાગરિકોને રોકવાના પ્રયાસો કરવાનો આક્ષેપ પણ કર્યો છે. આ તમામ રાજકીય વિવાદો વચ્ચે રવિવારની આ પદયાત્રા અને આગામી રેલી દેશની રાજનીતિમાં નવો મોટો વળાંક લાવે તેવી પૂરી સંભાવના છે.
