કેન્દ્રીય વાણિજ્ય અને ઉદ્યોગ મંત્રી પીયૂષ ગોયલે સોશિયલ મીડિયા પર આ ખુશખબર શેર કરતા જણાવ્યું હતું કે આ મંજૂરીથી આસામ અને ઉત્તર-પૂર્વના અગરવુડ (અધ) ઉદ્યોગને નવો વેગ મળશે. અત્યાર સુધી સ્થાનિક ઉત્પાદકો અને નિકાસકારોએ વિદેશી બજારો સુધી પહોંચવા માટે ભારે લોજિસ્ટિકલ પડકારોનો સામનો કરવો પડતો હતો, પરંતુ હવે ગુવાહાટી એરપોર્ટથી સીધી નિકાસ થવાથી આ પ્રક્રિયા અત્યંત સરળ અને ઝડપી બનશે. આ પગલાથી માત્ર આસામના જ નહીં પરંતુ સમગ્ર ઉત્તર-પૂર્વ ભારતના ખેડૂતો, ઉત્પાદકો અને વેપારીઓની આવકમાં મોટો વધારો થવાની પ્રબળ સંભાવના છે, જે પ્રદેશના આર્થિક વિકાસમાં સીમાચિહ્નરૂપ સાબિત થશે.
અગરવુડ, જેને 'ઓડ', 'એલોઝવુડ' કે 'ગહરુ' તરીકે પણ ઓળખવામાં આવે છે, તે એક અત્યંત મૂલ્યવાન, સુગંધિત અને રેઝિનયુક્ત લાકડું છે. આ લાકડું એક્વિલેરિયા (Aquilaria) પ્રજાતિના વૃક્ષોમાં કુદરતી ફૂગના સંક્રમણ કે ઈજા સામે રક્ષણ મેળવવાની પ્રક્રિયા દરમિયાન પેદા થાય છે. વૃક્ષ દ્વારા ઉત્પન્ન થતું આ ડાઘયુક્ત અને સુગંધિત રેઝિન સમય જતાં લાકડામાં એકત્ર થાય છે, જે વૈભવી પરફ્યુમ, અગરબત્તી અને અન્ય સુગંધિત ઉત્પાદનોના નિર્માણમાં મુખ્ય કાચો માલ બને છે. તેની આ દુર્લભ વિશેષતા અને મનમોહક સુગંધને કારણે વૈશ્વિક બજારમાં તેને 'સુગંધનું સોનું' માનવામાં આવે છે અને તેની ભારે માંગ રહે છે.
ભારતમાં અગરવુડના કુલ વૃક્ષોમાંથી આશ્ચર્યજનક રીતે ૯૬.૬ ટકા વૃક્ષો માત્ર ઉત્તર-પૂર્વ ભારતમાં જ આવેલા છે. એક સત્તાવાર અહેવાલ મુજબ, દેશના અંદાજે ૧૩૯.૮૯ મિલિયન અગરવુડ વૃક્ષોમાંથી એકલા આસામમાં જ ૧૧૪.૩ મિલિયન વૃક્ષો છે, જ્યારે ત્રિપુરામાં ૧૫.૧૫ મિલિયન વૃક્ષો ઉપલબ્ધ છે. આસામ ઉપરાંત મણિપુર, નાગાલેન્ડ અને મેઘાલયમાં પણ આનો વ્યાપ છે. ગલ્ફ દેશોમાં અગરવુડની અત્યંત ઊંચી માંગ હોવાની સાથેસાથે યુરોપ, અમેરિકા અને પૂર્વ એશિયામાં પણ લક્ઝરી ફ્રેગ્રન્સ સેક્ટરમાં તેનું ચલણ ઝડપથી વધી રહ્યું છે. કેન્દ્ર સરકાર દ્વારા તાજેતરના બજેટમાં પણ આ ક્ષેત્રને પ્રોત્સાહન આપવામાં આવ્યું છે, જેનાથી આ ઉદ્યોગ આગામી સમયમાં વૈશ્વિક સ્તરે નવી ઊંચાઈઓ સર કરશે.
