ઉત્તર પ્રદેશના ગ્રેટર નોઈડા સ્થિત પંજાબ નેશનલ બેંક (PNB) ની 'સેક્ટર પાઈ' શાખામાં કરોડો રૂપિયાની છેતરપિંડીનો એક મોટો પર્દાફાશ થયો છે. બેંકના બચત ખાતા અને ફિક્સ્ડ ડિપોઝિટ (FD) ધારકોના નાણાંની ગેરકાયદેસર રીતે ઉચાપત કરવાના ગંભીર કેસમાં સેન્ટ્રલ બ્યુરો ઓફ ઈન્વેસ્ટિગેશન (CBI) દ્વારા ગુનો નોંધવામાં આવ્યો છે. પીએનબીના નોઈડા સર્કલના ચીફ મેનેજર દ્વારા ગત ૨૩ ઓક્ટોબરે આપવામાં આવેલી લેખિત ફરિયાદને આધારે સીબીઆઈની ગાઝિયાબાદ સ્થિત એન્ટિ-કરપ્શન બ્યુરોએ આ એફઆઈઆર નોંધી છે. આ કૌભાંડમાં બેંકની ઓફિસ આસિસ્ટન્ટ દીપાંશી, ખાતાધારક આશુતોષ પાઠક અને અન્ય અજ્ઞાત જાહેર તથા ખાનગી વ્યક્તિઓને આરોપી બનાવવામાં આવ્યા છે.
આ સમગ્ર કૌભાંડનો ભાંડો ત્યારે ફૂટ્યો જ્યારે ગત ૧૬ સપ્ટેમ્બરના રોજ એક ગ્રાહકે પોતાના ખાતામાં શંકાસ્પદ ડેબિટ ટ્રાન્ઝેક્શન અંગે બેંક શાખાના વડાનો સંપર્ક કર્યો હતો. ત્યારબાદ બેંકે કરેલી આંતરિક તપાસમાં ચોંકાવનારી વિગતો બહાર આવી હતી કે છેલ્લા ત્રણ વર્ષ દરમિયાન ગ્રાહકોના ખાતામાંથી કુલ ૧૦.૨૪ કરોડ રૂપિયાના અનધિકૃત વ્યવહારો કરીને નાણાં સેરવી લેવામાં આવ્યા છે. પૂછપરછ દરમિયાન આરોપી ઓફિસ આસિસ્ટન્ટ દીપાંશીએ ભાંગી પડતા સ્વીકાર્યું હતું કે આ તમામ વ્યવહારો તેના પરિચિત અને ખાતાધારક આશુતોષ પાઠકના કહેવાથી કરવામાં આવ્યા હતા. પ્રાથમિક તપાસમાં બેંકના કોર બેંકિંગ સોલ્યુશન (CBS) ના યુઝર આઈડીનો દુરુપયોગ કરી સિસ્ટમ લોગ સાથે છેડછાડ કરવામાં આવી હોવાનું સામે આવ્યું છે.
આ ગંભીર કૌભાંડમાં આરોપીઓએ બેંક અધિકારીઓની જાણ બહાર તેમના યુઝર આઈડીનો દુરુપયોગ કરી ગ્રાહકોના ખાતાની વિગતો બદલી નાખી હતી, એફડી (FDR) ની વિગતોમાં ફેરફાર કર્યો હતો અને ફિક્સ્ડ ડિપોઝિટ સમયપૂર્વે તોડીને તે રકમ અન્ય લાભાર્થીઓના ખાતામાં ડાયવર્ટ કરી હતી. સીબીઆઈએ આ કેસમાં કાવતરું, વિશ્વાસઘાત, છેતરપિંડી અને ભ્રષ્ટાચાર નિવારણ તથા આઈટી એક્ટની વિવિધ કલમો હેઠળ ગુનો દાખલ કર્યો છે. બીજી તરફ, પીએનબી મેનેજમેન્ટે ગ્રાહકોને સંપૂર્ણ સુરક્ષાની ખાતરી આપતા જણાવ્યું છે કે બેંક તમામ વાજબી દાવાઓ સ્વીકારશે અને અત્યાર સુધીમાં ૪૩ લાખ રૂપિયાના ત્રણ દાવાઓનું સફળતાપૂર્વક નિકાલ પણ કરવામાં આવ્યો છે. બેંક આ મામલે તપાસ કરતી કેન્દ્રીય એજન્સીઓને સંપૂર્ણ સહકાર આપી રહી છે.
