નર્મદા જિલ્લાના દેડિયાપાડા ખાતે આવેલી ધામણ ખાડી પર બનાવવામાં આવેલા નવા પુલની નબળી કામગીરી અથવા કુદરતી ધોવાણને કારણે ગંભીર જોખમ ઊભું થયું છે. પુલના એક છેડે માટી બેસી જવાના કારણે ત્યાં એક મોટું કોતર અને જોખમી બાકોરું સર્જાયું છે. ગત ચોમાસાની સિઝન દરમિયાન પડેલું આ ગાબડું આજદિન સુધી રિપેર કરવામાં આવ્યું નથી, જેના કારણે તંત્રની ઘોર બેદરકારી સામે આવી છે. આ પુલ પરથી દિવસ-રાત ભારે સંખ્યામાં વાહનોની અવરજવર રહેતી હોવાથી, કોઈપણ સમયે મોટો અકસ્માત સર્જાવાની સંભાવના સ્થાનિક લોકો સેવી રહ્યા છે.
આ માર્ગ પરથી પસાર થતા ચાલકો માટે રાત્રિના સમયની મુસાફરી અત્યંત જોખમી બની ગઈ છે કારણ કે અંધારામાં આ ગાબડું નજરે ચડતું નથી. સંતુલન ખોરવાવાના ડરથી વાહનચાલકોમાં સતત ભય અને રોષનો માહોલ જોવા મળી રહ્યો છે. સ્થાનિક નાગરિકો અને મુસાફરો દ્વારા વહીવટી તંત્ર સમક્ષ ઉગ્ર માંગ કરવામાં આવી છે કે કોઈ મોટી દુર્ઘટના ઘટે તે પહેલાં તાત્કાલિક ધોરણે આ ગાબડાનું પુરાણ કરી પુલનું સમારકામ કરવામાં આવે તેમજ પૂરતી સલામતીના પગલાં લેવામાં આવે.
આ સમસ્યા માત્ર એક ગાબડા પૂરતી સીમિત નથી, પરંતુ અહીં વર્ષો જૂના પ્રશ્નો પણ જોડાયેલા છે. દેડિયાપાડાની ધામણ ખાડી પરનો જૂનો પુલ છેલ્લા અંદાજે ૧૫ વર્ષથી સંપૂર્ણપણે બંધ હાલતમાં છે. આ માર્ગ દેડિયાપાડા, ચિકદા, સાગબારા અને મહારાષ્ટ્રને નેત્રંગ, રાજપીપળા તથા સુરત સાથે જોડતો મુખ્ય રસ્તો હોવાથી અહીં ભારે ટ્રાફિક રહે છે. જૂના પુલની જગ્યાએ નવો અને મજબૂત પુલ બનાવવામાં આવે તેવી લોકલાંબી માંગ હોવા છતાં યોગ્ય કાર્યવાહી ન થવાને કારણે હજારો વાહનચાલકો દરરોજ ભારે હાલાકી વેઠવા મજબૂર બન્યા છે.
