ભરૂચ નગરપાલિકાની વર્તમાન ટર્મની બીજી અને દિવાળી પૂર્વેની આખરી સામાન્ય સભા પાલિકાના સભાખંડમાં પ્રમુખ દેવેન્દ્રસિંહ વસાવાના અધ્યક્ષસ્થાને મળી હતી. સભાની શરૂઆત સાથે જ સભાખંડનું વાતાવરણ ગરમાયું હતું અને રાષ્ટ્રગીતના મુદ્દાને લઈને શાસક તેમજ વિપક્ષના સભ્યો आमने-सामने આવી ગયા હતા. ગત સામાન્ય સભાની મિનિટ્સની મંજૂરી અને ત્રિમાસિક હિસાબના મુદ્દે પણ બંને પક્ષો વચ્ચે તુતુ-મેમે થતાં રાજકીય ગરમાવો વધી ગયો હતો. સભાની શરૂઆતની આ ઉગ્ર બોલાચાલીએ સ્થાનિક રાજકારણમાં ભારે ચર્ચા જગાવી હતી.
વિપક્ષી સભ્યોએ શાસક પક્ષ પર ગંભીર આક્ષેપો કરતા જણાવ્યું હતું કે, અગાઉની સભામાં પણ વિપક્ષના અવાજને દબાવવા માટે અને મહત્વની ચર્ચાઓ ટાળવા માટે શાસક ભાજપે જલ્દીથી રાષ્ટ્રગીત ગાઈને સભા આટોપી લીધી હતી. આ વખતે પણ સભાની શરૂઆતમાં જ આવો જ ઇરાદો હોવાની શંકા વ્યક્ત કરીને વિપક્ષે વિરોધ નોંધાવ્યો હતો, જેના જવાબમાં શાસક પક્ષના આગેવાનોએ પણ વળતો પ્રહાર કર્યો હતો. આ રાજકીય માથાકૂટ વચ્ચે વિપક્ષના પૂર્વ નેતા સમશાદઅલી સૈયદે શહેરમાં ડોર-ટુ-ડોર કચરા કલેક્શનની કામગીરીમાં મોટાપાયે ભ્રષ્ટાચાર થતો હોવાનો આક્ષેપ કર્યો હતો. સાથે જ, ૧૪માં નાણાપંચની ગ્રાન્ટની તપાસ કમિટીનો અહેવાલ અને નબળી સ્ટ્રીટ લાઈટો જેવા અનેક લોકપ્રશ્નો ઉઠાવીને શાસક પક્ષને ભીંસમાં લેવાનો પ્રયાસ કર્યો હતો.
પ્રારંભિક હોબાળા અને વિરોધ પક્ષના પ્રહારો બાદ આખરે સભાનું વાતાવરણ શાંત પડ્યું હતું અને નગરજનોના હિતને ધ્યાનમાં રાખીને આગળની કાર્યવાહી હાથ ધરવામાં આવી હતી. પાલિકા પ્રમુખ દેવેન્દ્રસિંહ વસાવાએ જણાવ્યું હતું કે તમામ વિરોધ અને ચર્ચાઓ વચ્ચે લોકશાહીઢબે બહુમતીના આધારે પાલિકા વિસ્તારના વિકાસને લગતા કુલ ૨૪ એજન્ડા મંજૂર કરવામાં આવ્યા છે. આગામી દિવાળીના તહેવારોને ધ્યાનમાં રાખીને શહેરની જનતાને ઉત્તમ સુવિધાઓ મળી રહે તે હેતુસર રોડ પેચવર્ક, સ્ટ્રીટ લાઈટ અને અન્ય માળખાકીય સુવિધાઓના કામો યુદ્ધના ધોરણે પૂરા કરવાની ખાતરી પણ પ્રમુખ દ્વારા આપવામાં આવી હતી.
