ફ્રાંસ અને સ્પાઈનની તર્જ પર ઇટાલીમાં પણ મોંઘવારી વિરુદ્ધનો અસંતોષ હવે ખુલ્લેઆમ સપાટી પર આવ્યો છે. શુક્રવારે દેશભરમાં યોજાયેલા આ વિશાળ વિરોધ પ્રદર્શનમાં હજારોની સંખ્યામાં વિદ્યાર્થીઓ અને કામદારો જોડાયા હતા. યુએસબી (USB) ટ્રેડ યુનિયન દ્વારા બોલાવવામાં આવેલી આ સામાન્ય હડતાલને કારણે જનજીવન પ્રભાવિત થયું હતું. આ પ્રદર્શનોમાં માત્ર વિદ્યાર્થીઓ જ નહીં, પરંતુ ટ્રક ડ્રાઇવરો, ટેક્સી ચાલકો અને ખેડૂતો પણ મોટી સંખ્યામાં સામેલ થયા હતા, જેમણે તાજેતરમાં ઇંધણના વધતા ભાવ અને રક્ષણાત્મક ખર્ચ સામે મોરચો ખોલ્યો છે. આ આંદોલનકારીઓએ રોમ, મિલાન અને તુરિન જેવા મોટા શહેરોના મુખ્ય માર્ગો પર રેલીઓ કાઢીને સરકાર વિરુદ્ધ સૂત્રોચ્ારો કર્યા હતા.
વિદ્યાર્થીઓ અને યુવાનોએ દેશની શૈક્ષણિક સંસ્થાઓની દયનીય સ્થિતિ અને મોંઘા શિક્ષણ સામે ઉગ્ર રોષ વ્યક્ત કર્યો હતો. રોમ અને મિલાનમાં રેલીઓ દરમિયાન વિદ્યાર્થીઓએ જણાવ્યું હતું કે યુનિવર્સિટીઓની ભારે ફી અને માસિક ૧૨૦૦ યુરો સુધી પહોંચતું મકાનનું ભાડું હવે વાલીઓ માટે અસહ્ય બની ગયું છે. એટલું જ નહીં, શાળાઓમાં જર્જરિત ઇમારતો અને પાયાની સુવિધાઓનો અભાવ હોવાથી યુવા વર્ગમાં ભારે નારાજગી જોવા મળી છે. આંદોલનકારીઓએ 'અમને બોમ્બ નહીં, મકાનો જોઈએ' અને 'આપણું ભવિષ્ય પાછું મેળવો' જેવા નારાઓ સાથે સરકાર સમક્ષ મોંઘવારી પર કાબૂ મેળવવા અને શિક્ષણ ક્ષેત્રે વિશેષ ભંડોળ ફાળવવાની પ્રબળ માંગ કરી હતી.
આ વિશાળ દેખાવો મોટાભાગે શાંતિપૂર્ણ રહ્યા હતા, જો કે તુરિન અને રોમ જેવા કેટલાક શહેરોમાં પોલીસ સાથે છૂટીછવાઈ હિંસક અથડામણો પણ જોવા મળી હતી. પરિસ્થિતિને કાબૂમાં લેવા માટે પોલીસે વોટર કેનન અને લાઠીચાર્જનો ઉપયોગ કર્યો હતો. બીજી તરફ, મિલાનમાં અગાઉ થયેલી હિંસા બાદ જ્યોર્જિયા મેલોનીની સરકારે સાર્વ સભા કાયદાઓ કડક બનાવ્યા છે. જો કે, સરકાર દ્વારા ટ્રક ચાલકો, ખેડૂતો અને માછીમારો માટે રાહત પેકેજની જાહેરાત કરવામાં આવી છે તેમજ આગામી બજેટમાં યુવાનો માટે વિશેષ આર્થિક બોનસની જોગવાઈઓ પણ વિચારણા હેઠળ છે, છતાં જમીની સ્તરે અસંતોષ યથાવત છે.
