કેનેડાના ટોરંટો શહેરના સૌથી પોશ અને અમીર ગણાતા બ્રિડલ પાથ વિસ્તારમાં એક ચોંકાવનારી ઘટના સામે આવી છે, જ્યાં પ્રખ્યાત ‘મેક ગ્રૂપ’ના બોસ ડેવિડ મોર્ટનનું 2.1 મિલિયન ડૉલરનું વૈભવી મેન્શન લૂંટારાઓના નિશાના પર આવ્યું હતું. રાત્રે અંદાજે ૩:૪૫ વાગ્યાના સુમારે ત્રણ હૂડી અને સ્કાય માસ્ક પહેરેલા અજાણ્યા હુમલાખોરો પાછળના દરવાજાથી આ પાંચ બેડરૂમના વિશાળ મકાનમાં બળજબરીથી ઘૂસી આવ્યા હતા. આ હુમલાખોરો પાસે હેન્ડગન અને હથોડી જેવા ઘાતક હથિયારો હતા, અને તેમનો મુખ્ય હેતુ ઘરમાંથી કિંમતી ચીજવસ્તુઓની લૂંટ ચલાવવાનો હોવાનું પોલીસ તપાસમાં બહાર આવ્યું છે.
જ્યારે લૂંટારાઓ ઘરમાં ઘૂસ્યા ત્યારે ડેવિડ મોર્ટન અને તેમના પરિવારે કોઈપણ ડર વગર આ ત્રણ સશસ્ત્ર હુમલાખોરો સામે બહાદુરીપૂર્વક લડત આપી હતી. પરિવારે આક્રમક પ્રતિકાર કરતાં ઉશ્કેરાયેલા હુમલાખોરોએ અંધાધૂંધ ગોળીબાર કર્યો હતો અને પરિવારના સભ્યો પર ઘાતક હુમલા કર્યા હતા. આ ખતરનાક સંઘર્ષમાં ૭૫ વર્ષીય ડેવિડ મોર્ટન અને તેમની બે પુત્રીઓ - મેગી અને ક્રિસ્ટીનાને ગોળી વાગી હતી, જ્યારે તેમની પત્ની ડોરિયાના ઝોહિલ-મોર્ટનને લૂંટારાઓએ હથોડીના પ્રહારોથી ગંભીર રીતે ઘાયલ કરી દીધી હતી. હુમલા બાદ તમામ આક્રમક ઇસમો ઘટનાસ્થળેથી એક એસયુવી કારમાં ફરાર થઈ ગયા હતા.
ટોરંટો પોલીસ સ્ટેશનના ઇન્સ્પેક્ટર ક્રિસ્ટી સ્મિથના જણાવ્યા અનુસાર, આ હિચકારા હુમલામાં ભોગ બનનાર બે વ્યક્તિઓને જીવનભર માટે રહી જાય તેવી ગંભીર ઇજાઓ પહોંચી છે અને હાલ હોસ્પિટલમાં તેમની સારવાર ચાલી રહી છે. આ ઘટના બાદ સમગ્ર વિસ્તારમાં સનસનાટી ફેલાઈ ગઈ છે અને ટોરંટોના મેયર ઓલિવિયા ચોવે આ હિંસાની આકરી ટીકા કરી છે. પોલીસ આ મામલાની ગંભીરતાથી તપાસ કરી રહી છે અને હજી સુધી એ સ્પષ્ટ નથી થઈ શક્યું કે લૂંટારાઓ ઘરમાંથી કઈ કિંમતી ચીજો ચોરીને ભાગવામાં સફળ રહ્યા છે કે કેમ.
