દેશમાં સ્માર્ટફોન અને ટેલિવિઝનનું ઉત્પાદન કરતી અગ્રણી કંપનીઓને તહેવારોની મોસમ દરમિયાન ભારે આર્થિક ફટકો પડ્યો છે. ઓનમથી લઈને દિવાળી સુધીની તહેવારોની સિઝનમાં ગ્રાહકો તરફથી નબળો પ્રતિસાદ મળવાને કારણે બજારમાં અદ વેચાયેલો સામાન મોટા પ્રમાણમાં પડી રહ્યો છે. અગાઉથી જ નબળા વર્ષનો સામનો કરી રહેલા આ ઉદ્યોગ માટે તહેવારોની સિઝનમાં વેચાણ ૨૫ ટકા જેટલું ઘટી જવું એ એક મોટો ચિંતાનો વિષય બન્યો છે. આ સ્થિતિને પહોંચી વળવા માટે અગ્રણી બ્રાન્ડ્સ અને કોન્ટ્રાક્ટ ઉત્પાદકોએ આગામી બેથી ત્રણ મહિના માટે નિર્ધારિત ઉત્પાદન લક્ષ્યાંકમાં ૨૦ ટકા સુધીનો ઘટાડો કરવાનો નિર્ણય લીધો છે.
આ ઉત્પાદન કાપ પાછળનું મુખ્ય કારણ આર્ટિફિશિયલ ઇન્ટેલિજન્સ (AI) સેક્ટરની માંગને કારણે વૈશ્વિક સ્તરે મેમરી ચિપના ભાવમાં થયેલો બેફામ વધારો છે. છેલ્લા દસ મહિનામાં મેમરી ચિપના ભાવ બે થી ત્રણ ગણા વધી ગયા છે, જેની સીધી અસર તૈયાર ઉપકરણોની કિંમતો પર પડી છે. સ્માર્ટફોનની કિંમતમાં ૩૫ થી ૪૦ ટકા અને ટેલિવિઝનની કિંમતમાં ૨૦ થી ૨૫ ટકાનો ભારે વધારો થવાથી બજારના મુખ્ય આધાર સમાન એન્ટ્રી-ટુ-મિડ-રેન્જ સેગમેન્ટની માંગ પર ગંભીર અસર થઈ છે. જૈના ગ્રૂપના મેનેજિંગ ડિરેક્ટર પ્રદીપ જૈન અને હાયર ઇન્ડિયાના સીઈઓ સતીશ એન.એસ. જેવા ઉદ્યોગના અગ્રણીઓએ પણ આ વાતને સમર્થન આપતા જણાવ્યું છે કે, ચેનલ ઇન્વેન્ટરી ખાલી કરવા માટે મશીનો બંધ કરવા પડ્યા છે.
આ વર્ષે જાન્યુઆરીથી સપ્ટેમ્બર દરમિયાન પણ સ્માર્ટફોન અને ટીવીના વેચાણમાં વાર્ષિક ધોરણે ૧૦ ટકાથી વધુનો ઘટાડો નોંધાયો હતો, અને તહેવારોની મોસમમાં પણ આ નબળાઈ યથાવત્ રહી છે. સોની ઇન્ડિયાના મેનેજિંગ ડિરેક્ટર સુનીલ નાયરના જણાવ્યા અનુસાર, ૬૫ ઇંચ કે તેથી મોટા સ્ક્રીનવાળા પ્રીમિયમ સેગમેન્ટમાં થોડી વૃદ્ધિ જોવા મળી છે, પરંતુ ૫૫ ઇંચ અને તેનાથી નાના કદના ટીવી સેગમેન્ટમાં ભારે દબાણ છે. પ્રિન્ટેડ સર્કિટ બોર્ડ અને મેમરી ચિપના વધતા ભાવ આગામી દિવસોમાં પણ ચિંતાનો વિષય રહેશે, જોકે ઉદ્યોગ જગતને આશા છે કે ઊંચી કિંમતો છતાં આગામી વર્ષે ગ્રાહકો ફરીથી ખરીદી તરફ વળશે ત્યારે બજારમાં સુધારો જોવા મળશે.
