વિશ્વની સૌથી ઊંચી સરદાર વલ્લભભાઈ પટેલની પ્રતિમા 'સ્ટેચ્યુ ઓફ યુનિટી' ખાતે દેશ અને દુનિયામાંથી લાખોની સંખ્યામાં પ્રવાસીઓ મુલાકાતે આવતા હોય છે. પ્રવાસીઓની આ વધતી જતી સંખ્યાને ધ્યાનમાં રાખીને એકતાનગર રેલવે સ્ટેશન પાસે IRCTC દ્વારા એક ભવ્ય અને અત્યાધુનિક હોટેલનું નિર્માણ કરવામાં આવ્યું છે. અંદાજે બે એકર જેટલા વિશાળ વિસ્તારમાં પથરાયેલી અને 52.50 કરોડ રૂપિયાના ખર્ચે તૈયાર થયેલી આ હોટેલ પ્રવાસીઓ માટે આકર્ષણનું નવું કેન્દ્ર બનશે. આ હોટેલમાં કુલ 127 આધુનિક રૂમ, પ્રવાસીઓ માટે સ્વિમિંગ પૂલ, સ્વાદિષ્ટ વ્યંજનો માટે રેસ્ટોરન્ટ અને કેફેટેરિયા તેમજ મોટાં આયોજનો માટે ભવ્ય બેન્ક્વેટ હોલ જેવી સુવિધાઓ ઉપલબ્ધ કરાવવામાં આવી છે.
આ નવી હોટેલના નિર્માણથી એકતાનગર આવતા પ્રવાસીઓની સગવડમાં નોંધપાત્ર વધારો થશે, ખાસ કરીને રેલવે સ્ટેશનની નજીક હોવાથી ટ્રેન દ્વારા આવતા પ્રવાસીઓને રોકાણ માટે ઉત્તમ અને સરળ વિકલ્પ મળી રહેશે. સ્ટેચ્યુ ઓફ યુનિટી ખાતે અત્યાર સુધીમાં ત્રણ કરોડથી વધુ પ્રવાસીઓએ મુલાકાત લીધી છે, ત્યારે આ હોટેલ શરૂ થવાથી પ્રવાસીઓ માટે નાઇટ સ્ટે (રાત્રિ રોકાણ) સરળ બનશે અને સ્થાનિક અર્થતંત્રને મોટું પ્રોત્સાહન મળશે. આ ઉપરાંત, આ હોટેલ માત્ર પર્યટન જ નહીં પરંતુ બિઝનેસ ટુરિઝમ માટે પણ મહત્વની સાબિત થશે, કારણ કે અહીં ઉપલબ્ધ કોન્ફરન્સ સુવિધાઓને કારણે એકતાનગર ભવિષ્યમાં કોર્પોરેટ ઇવેન્ટ્સ અને બિઝનેસ મીટિંગ્સનું પણ પ્રમુખ કેન્દ્ર બનશે.
આ પ્રોજેક્ટથી પર્યટનને વેગ મળવાની સાથે-સાથે સ્થાનિક સ્તરે રોજગારીના નવા દ્વાર પણ ખુલશે. હોટેલના સુચારુ સંચાલન માટે હાઉસકીપિંગ, કેટરિંગ અને મેનેજમેન્ટ જેવા ક્ષેત્રોમાં સ્થાનિક યુવક-યુવતીઓ માટે પ્રત્યક્ષ રોજગારીની વિશાળ તકો ઊભી થશે, જેનાથી પ્રદેશના યુવાનો આત્મનિર્ભર બનશે. નર્મદાના કાંઠે આવેલી 597 ફૂટ ઊંચી આ પ્રતિમા આજે વૈશ્વિક ફલક પર ભારતનું ગૌરવ વધારી રહી છે, અને આ નવી હોટેલ ભેટ મળવાથી એકતાનગરની આગતાસ્વાગતાની ક્ષમતામાં વધુ એક સીમાચિહ્ન ઉમેરાશે.
