દિલ્હીના જનકપુરી સ્થિત ડિસ્ટ્રિક્ટ કન્ઝ્યુમર ડિસ્પ્યુટ્સ રિડ્રેસલ કમિશને વીમા કંપનીઓની મનમાની સામે એક કડક અને સીમાચિહ્નરૂપ ચુકાદો આપ્યો છે. વર્ષ ૨૦૧૯માં કીર્તિ નગર પાસે ચાલુ ગાડીએ અચાનક આગ લાગવાથી પ્રમોદ કુમાર નામની વ્યક્તિની રેનો ડસ્ટર કાર સંપૂર્ણપણે બળીને ખાખ થઈ ગઈ હતી. કાર માલિક દ્વારા વીમા કંપની સમક્ષ તમામ જરૂરી દસ્તાવેજો રજૂ કરવા છતાં, કંપનીએ કોઈપણ સંતોષકારક કારણ વગર વીમા દાવો ચૂકવવાનો ઇનકાર કર્યો હતો. આ લાંબી કાનૂની લડતના અંતે આયોગે વીમા કંપનીની સેવાઓમાં બેદરકારી સ્વીકારીને વાહનની વીમા ઘોષિત કિંમત (IDV) ચૂકવવાનો આદેશ કર્યો છે.
આ કેસની વિગતો મુજબ, પ્રમોદ કુમારે પોતાની કારનો બજાજ અલાયન્ઝ જનરલ ઇન્શ્યોરન્સમાંથી વીમો લીધો હતો, જેની વેલિડિટી ફેબ્રુઆરી ૨૦૧૯થી ફેબ્રુઆરી ૨૦૨૦ સુધીની હતી અને તેની વીમા કિંમત ૫.૭૫ લાખ રૂપિયા નક્કી કરવામાં આવી હતી. ૩૧ જુલાઈ ૨૦૧૯ની રાત્રે જ્યારે તેઓ કાર લઈને ઘરે જઈ રહ્યા હતા ત્યારે પેટ્રોલ પંપ નજીક કારમાં ભીષણ આગ લાગી હતી. તેમણે તાત્કાલિક પોલીસ અને ફાયર બ્રિગેડને જાણ કરી હોવા છતાં કાર સંપૂર્ણપણે નાશ પામી હતી. વીમા કંપની દ્વારા માંગવામાં આવેલા ડ્રાઇવિંગ લાયસન્સ, ફાયર રિપોર્ટ અને ટેકનિકલ રિપોર્ટ જેવા તમામ પુરાવાઓ જમા કરાવવા છતાં કંપનીએ ક્લેમ પાસ ન કરતાં માલિકે ગ્રાહક આયોગના દરવાજા ખખડાવ્યા હતા.
આયોગના પ્રમુખ સોનિકા મેહરોત્રા અને સભ્યોની બનેલી બેન્ચે સુનાવણી દરમિયાન નોંધ્યું હતું કે વીમા કંપની કે તેના પ્રતિનિધિઓ આયોગ સમક્ષ હાજર રહ્યા ન હતા અને ન તો કોઈ બચાવ પક્ષ રજૂ કર્યો હતો. આથી, એકતરફી કાર્યવાહી હાથ ધરીને અદાલતે વીમા કંપનીને દોષી ઠેરવી હતી. જોકે, અદાલતે વાહનના ઉત્પાદક અને અધિકૃત સર્વિસ સેન્ટરને આ કેસમાંથી મુક્ત કર્યા હતા કારણ કે તેમાં તેમનો કોઈ દોષ સાબિત થયો ન હતો. આયોગે બજાજ અલાયન્ઝ ઇન્શ્યોરન્સને કારની કિંમતના ૫.૭૫ લાખ રૂપિયા, માનસિક ત્રાસ માટે ૨૫,૦00 રૂપિયા અને કાનૂની ખર્ચ પેટે ૧૦,૦૦૦ રૂપિયા મળીને કુલ રકમ આદેશ મળ્યાના ૩૦ દિવસમાં ચૂકવવાનો આદેશ આપ્યો છે.
