દિલ્હીના જવાહરલાલ નેહરુ (જેએલએન) સ્ટેડિયમ ખાતે યોજાનારી પ્રખ્યાત ગાયક દિલજીત દોસાંજના ‘ઓરા ઇન્ડિયા ટૂર ૨૦૨૬’ કોન્સર્ટને લઈને વહીવટી તંત્ર સંપૂર્ણપણે સજ્જ બન્યું છે. કોન્સર્ટમાં અંદાજે ૭૦,૦૦૦ જેટલા સંગીતપ્રેમીઓ ઉમટી પડવાની સંભાવના છે, જેને ધ્યાનમાં રાખીને દિલ્હી મેટ્રો રેલ કોર્પોરેશન (DMRC) દ્વારા મુસાફરોની સુવિધા માટે વિશેષ વ્યવસ્થાઓ કરવામાં આવી છે. એરપોર્ટ એક્સપ્રેસ લાઇન સિવાયની તમામ મેટ્રો લાઇન પર રાત્રે સામાન્ય સમય કરતાં મોડા સુધી મેટ્રો સેવાઓ ચાલુ રહેશે, જેથી કાર્યક્રમ પૂર્ણ થયા બાદ લોકોને પરત ફરવામાં કોઈ મુશ્કેલી ન પડે.
કોન્સર્ટના દિવસે ભીડને નિયંત્રિત કરવા માટે સમગ્ર નેટવર્ક પર વધારાની ટ્રેન ટ્રિપ્સ ચલાવવામાં આવશે અને સ્ટેન્ડબાય ટ્રેનો પણ તૈયાર રાખવામાં આવશે. ડીએમઆરસીના જણાવ્યા અનુસાર, વિસ્તૃત સેવા સમયને કારણે 'દિલ્હી મેટ્રો સારથિ એપ' પર QR ટિકિટ ખરીદવાનો સમય પણ એક કલાક વધારવામાં આવ્યો છે. સ્ટેશનો પર મુસાફરોની અવરજવરને વ્યવસ્થિત કરવા અને માર્ગદર્શન આપવા માટે વધારાનો ગ્રાહક સેવા સ્ટાફ અને સુરક્ષાકર્મીઓ તૈનાત રહેશે. સ્ટેડિયમની સૌથી નજીકનું મેટ્રો સ્ટેશન વાયોલેટ લાઇન પર આવેલું જેએલએન સ્ટેડિયમ છે, જ્યારે જંગપુરા, આઈએનએ અને જોર બાગ સ્ટેશનો પણ વૈકલ્પિક માર્ગ તરીકે ઉપયોગમાં લઈ શકાશે.
ટ્રાફિક વ્યવસ્થાપન અંગે દિલ્હી ટ્રાફિક પોલીસે બપોરે ૧ વાગ્યાથી મધ્યરાત્રિ સુધી જેએલએન સ્ટેડિયમની આસપાસના રસ્તાઓ પર વિશેષ પ્રતિબંધો અને ડાયવર્ઝન જાહેર કર્યા છે. ભીષ્મ પિતામહ માર્ગ, લોધી રોડ, લાલા લાજપત રાય માર્ગ અને બારાપુલ્લા ફ્લાયઓવર સહિતના મુખ્ય માર્ગો પર વાહનોની અવરજવર પ્રભાવિત રહેશે. સ્ટેડિયમની આસપાસ કોઈ જાહેર પાર્કિંગની સુવિધા ઉપલબ્ધ ન હોવાથી પોલીસે નાગરિકોને વાહનોને બદલે મેટ્રો સેવાનો મહત્તમ ઉપયોગ કરવા અને સમયસર રવાના થવાની અપીલ કરી છે.
