વડાપ્રધાન નરેન્દ્ર મોદીના ગુજરાત પ્રવાસના પ્રથમ દિવસે ઉત્તર ગુજરાતના સરહદી જિલ્લા બનાસકાંઠામાં અનોખો ઉત્સાહ જોવા મળી રહ્યો છે. ડીસા એરપોર્ટ પર આગમન બાદ પીએમ મોદીના ભવ્ય રોડ-શોનું આયોજન કરવામાં આવ્યું છે, જ્યાં સ્થાનિક જનમેદની દ્વારા તેમનું ઉષ્માભર્યું સ્વાગત કરાશે. આજના આ પ્રવાસ દરમિયાન વડાપ્રધાન ભીલડી ખાતે ૧૨૭ એકરના વિશાળ ક્ષેત્રફળમાં નિર્મિત અદ્યતન 'BBBRC કેટલ ફાર્મ' (બોવાઈન બ્રીડીંગ રિસર્ચ સેન્ટર) અને ET IVF લેબની મુલાકાત લેશે. આ ઉપરાંત, તેઓ બનાસકાંઠા સૈનિક સ્કૂલના બાળકો, પશુપાલક મહિલાઓ અને સ્થાનિક યુવાનો સાથે વિશેષ સંવાદ સાધીને તેમને પ્રોત્સાહિત કરશે.
બનાસકાંઠાના ભીલડી ખાતે યોજાનાર ભવ્ય જનસભૂલ અને મહાસભામાં વડાપ્રધાન રાજ્યભર માટે રૂ. ૧૪ હજાર કરોડથી વધુના વિવિધ વિકાસપ્રકલ્પોનું લોકાર્પણ અને ખાતમુહૂર્ત કરશે. આ પ્રસંગે દેશભરના કરોડો ખેડૂતો માટે અત્યંત મહત્વપૂર્ણ એવી 'પીએમ કિસાન સન્માન નિધિ' યોજના અંતર્ગત ૨૪મા હપ્તાની રકમ સીધી જ લાભાર્થી ખેડૂતોના બેંક ખાતામાં જમા કરાવવામાં આવશે, જેનાથી ખેડૂતોમાં વહેલી દિવાળી જેવો આનંદ છવાઈ ગયો છે. આ સાથે જ પ્રાદેશિક સંપર્ક અને મુસાફરીને વધુ સરળ બનાવવા માટે બે નવી પેસેન્જર ટ્રેનોને પણ લીલી ઝંડી આપીને પ્રસ્થાન કરાવવામાં આવશે.
બપોર બાદ વડાપ્રધાન નર્મદા જિલ્લાના વિશ્વપ્રસિદ્ધ પ્રવાસન સ્થળ કેવડિયા (એકતાનગર) ખાતે પહોંચશે, જ્યાં વિકાસ અને સંસ્કૃતિનો અદ્ભુત સમન્વય જોવા મળશે. તેઓ અહીં 'ભારત પર્વ પેવેલિયન'ની મુલાકાત લેશે અને કલ્ચર ગ્રાઉન્ડ ખાતે રાષ્ટ્રભાવનાથી ઓતપ્રોત 'આનંદ મઠ' નાટકના વિશેષ મંચનમાં ઉપસ્થિત રહેશે. સાંજના સમયે તેઓ ઝગમગતા 'એકતા પ્રકાશ પર્વ'માં સહભાગી થઈને ઐતિહાસિક નર્મદા ઘાટ પર વૈદિક મંત્રોચ્ચાર સાથે મા નર્મદાની ભવ્ય મહાઆરતી ઉતારશે અને કેવડિયા ખાતે જ રાત્રિ રોકાણ કરશે.
