ખેડા જિલ્લા વન વિભાગની ગંભીર નિષ્કાળજી અને લાપરવાહીને કારણે સમગ્ર વિસ્તારમાં હરિયાળા વૃક્ષોનું અંધાધૂંધ નિકંદન નીકળી રહ્યું છે. જિલ્લાના વડામથક નડિયાદમાં રાતના અંધારાની આડમાં મોટા પાયે વૃક્ષો કાપીને તેનો ગેરકાયદે વેપાર બેરોકટોક ચલાવવામાં આવી રહ્યો છે. વન વિભાગના અધિકારીઓની રહેમનજર કે ગેરહાજરીના લીધે મૂલ્યવાન વન સંપદાને નષ્ટ કરવામાં આવી રહી છે અને કાયદાના તમામ નિયમોને સરેઆમ નેવે મૂકવામાં આવ્યા છે.
સ્થિતિ એટલી હદે વણસી છે કે નડિયાદ શહેરના કમળા ચોકડી પાસે આવેલા રિંગરોડના ગ્રાઉન્ડ પર રોજ વહેલી સવારે સેંકડો વાહનો લાકડા ભરીને ઉતરી પડે છે. અહીં કોઈ પણ પ્રકારની મંજૂરી કે પાસ વિના ૫૦૦થી વધુ ટ્રેક્ટરો અને ૧૦૦થી વધુ ઓવરલોડ ટ્રકો દ્વારા લાકડાની હેરાફેરી થાય છે અને ખુલ્લેઆમ તેની હરાજી કરીને વેચાણ કરવામાં આવે છે. આટલી મોટી ગેરકાયદે પ્રવૃત્તિઓ ચાલતી હોવા છતાં સ્થાનિક વહીવટી તંત્ર અને આરટીઓ વિભાગ આંખ આડા કાન કરીને ઘસઘસાટ ઊંઘી રહ્યું હોય તેવું પ્રતીત થાય છે.
આ પ્રકારે બેફામ રીતે થઈ રહેલા વૃક્ષ છેદનને કારણે ખેડા જિલ્લાનું ગ્રીન કવર ઝડપથી નષ્ટ થઈ રહ્યું છે, જેની સીધી અસર સ્થાનિક પર્યાવરણ અને વાતાવરણ પર પડી રહી છે. જાગૃત નાગરિકો અને પર્યાવરણવિદો ચિંતા વ્યક્ત કરી રહ્યા છે કે જો આ ગેરકાયદે ધંધાને તાત્કાલિક નહીં અટકાવવામાં આવે, તો ભવિષ્યમાં ભયંકર ગરમી, અનિયમિત વરસાદ અને શુદ્ધ હવાની અછત જેવી ગંભીર સમસ્યાઓનો સામનો કરવો પડશે. જવાબદાર તંત્ર દ્વારા આ મામલે સત્વરે સઘન પગલાં લેવામાં નહીં આવે તો આગામી પેઢી માટે ગંભીરકટોકટી સર્જાશે.
