એસોસિએશન ફોર ડેમોક્રેટિક રિફોર્મ્સ (ADR) દ્વારા જારી કરવામાં આવેલા વિશ્લેષણમાં જણાવવામાં આવ્યું છે કે ૨૦૨૫ની બિહાર વિધાનસભા ચૂંટણીમાં ૨૩૮ બેઠકો પર ચૂંટણી લડનાર અને એકપણ બેઠક ન જીતી શકનાર જન સુરાજ પાર્ટીને નાણાકીય વર્ષ ૨૦૨૪-૨૫માં જંગી આર્થિક સહાય મળી છે. પક્ષ દ્વારા જાહેર કરાયેલા આંકડાઓ અનુસાર તેમની કુલ આવક ૧૦૧.૩૨ કરોડ રૂપિયા રહી હતી, જેમાં ૯૯.૪૦ કરોડ રૂપિયા માત્ર દાન સ્વરૂપે આવ્યા હતા. આ મસમોટા ભંડોળની સામે પક્ષ દ્વારા ચૂંટણી પ્રચાર અને અન્ય ગતિવિધિઓ પાછળ માત્ર ૯.૨ કરોડ રૂપિયાનો જ ખર્ચ કરવામાં આવ્યો છે, જે કુલ આવક સામે ખૂબ જ નહિવત કહી શકાય. જોકે, ચૂંટણી પરિણામો પછી જુલાઈમાં યોજાયેલી પેટાચૂંટણીમાં પક્ષના સંસ્થાપક પ્રશાંત કિશોરે વિજય મેળવીને વિધાનસભામાં ખાતું ખોલાવ્યું હતું અને પક્ષે વિધાન પરિષદમાં પણ એક બેઠક મેળવી છે.
દેશના ટોચના ૧૦ નોંધાયેલા બિનમાન્ય રાજકીય પક્ષો (RUPPs) ને મળેલા ભંડોળમાં જન સુરાજ પાર્ટીનું વર્ચસ્વ સૌથી મોટું રહ્યું હોવાનું ADRના રિપોર્ટમાં સ્પષ્ટ થયું છે. તમામ ટોચના ૧૦ પક્ષોના ટોચના ૧૦ દાતાઓએ કુલ ૧૨૦ કરોડ રૂપિયાનું દાન આપ્યું હતું, જેમાંથી એકલા જન સુરાજે ૧૦૪ દાન વ્યવહારો દ્વારા ૯૭.૭૨ કરોડ રૂપિયા એટલે કે કુલ ભંડોળના ૮૦ ટકા હિસ્સો મેળવ્યો હતો. આમાં ખાસ કરીને વેધાસ વેન્ચર્સ (Vedhas Ventures) દ્વારા ૮૫ વ્યવહારોમાં ૮૫ કરોડ રૂપિયાનું માતબર દાન આપવામાં આવ્યું હતું, જ્યારે પક્ષના સ્થાપક પ્રશાંત કિશોરે પોતે ૧૦ વ્યવહારો દ્વારા ૧૦ કરોડ રૂપિયાનું યોગદાન આપ્યું હતું. આની સરખામણીએ અન્ય બાકીના નવ રાજકીય પક્ષોને તેમના ટોચના ૧૦ દાતાઓ પાસેથી માત્ર ૨૩.૨૬ કરોડ રૂપિયા જ પ્રાપ્ત થયા હતા, જે જન સુરાજની આર્થિક ક્ષમતા અને લોકપ્રિયતા દર્શાવે છે.
બીજી તરફ, ADRના આ વિશ્લેષણે દેશના નાના અને બિનમાન્ય રાજકીય પક્ષોની પારદર્શકતા પર પણ ગંભીર સવાલો ઊભા કર્યા છે. રિપોર્ટ અનુસાર, નોંધાયેલા બિનમાન્ય રાજકીય પક્ષોમાંથી લગભગ ૬૫ ટકા એટલે કે ૧,૩૩૦ જેટલા પક્ષોના નાણાકીય વર્ષ ૨૦૨૪-૨૫ના વાર્ષિક ઓડિટ અને ફાળા અહેવાલો હજુ સુધી જાહેર ડોમેનમાં ઉપલબ્ધ થયા નથી, જે ચૂંટણી ભંડોળમાં જવાબદારીના અભાવ તરફ ઈશારો કરે છે. આ સિવાય દેશના ટોચના ૧૫ RUPPs એ ઉચ્ચ-મૂલ્યના દાન પેટે આશરે ૧,૦૬૪ કરોડ રૂપિયા જાહેર કર્યા છે. આમ, રાજકીય ફંડિંગ અને તેના વ્યાપક ઉપયોગ બાબતે જન સુરાજ પાર્ટી હાલમાં તેના મસમોટા આંકડાઓને લઈને રાજકીય અને નાણાકીય વર્તુળોમાં ભારે ચર્ચાનો વિષય બની છે.
