દહેગામ શહેરના અમીનવાડા વિસ્તારમાં રહેતા ૭૩ વર્ષીય પ્રતિષ્ઠિત સામાજિક આગેવાન નરેશભાઈ બાબુભાઈ અમીન રોજિંદા ક્રમ મુજબ સવારના આશરે દસ વાગ્યાના સુમારે પોતાના બાઇક ઉપર સવાર થઈને ખેતર તરફ જવા માટે રવાના થયા હતા. તે દરમિયાન શહેરના વેદ બંગલોઝ પાછળ આવેલા ટીપી રોડ પર પુરઝડપે દોડી રહેલા કોઈ અજાણ્યા વાહને તેમના બાઇકને જોરદાર ટક્કર મારી હતી. આ અકસ્માત એટલો ભીષણ હતો કે નરેશભાઈ માર્ગ પર ફંગોળાઈને ગંભીર રીતે ઇજાગ્રસ્ત થઈ ગયા હતા, જ્યારે અકસ્માત સર્જનાર વાહનચાલક ઘટનાસ્થળેથી પોતાની ગાડી લઈને ફરાર થઈ જવામાં સફળ રહ્યો હતો.
ઘટનાની જાણ થતા જ આસપાસના સ્થાનિક લોકો તાત્કાલિક મદદે દોડી આવ્યા હતા અને ગંભીર ઈજા પામેલા વૃદ્ધ આગેવાનને તાત્કાલિક સારવાર અર્થે દહેગામ સામુદાયિક આરોગ્ય કેન્દ્ર (સીએચસી) ખાતે ખસેડવામાં આવ્યા હતા. જો કે, હોસ્પિટલ પહોંચતા જ ફરજ પર હાજર તબીબોએ તપાસીને નરેશભાઈને મૃત જાહેર કર્યા હતા. મૃતક નરેશભાઈ અમીન દહેગામના જાણીતા સિનિયર એડવોકેટ ગોપીનાથ અમીનના ભાઈ થતા હતા, જેથી આ અચાનક બનેલી દુર્ઘટનાના સમાચાર વાયુવેગે પ્રસરતા જ સમગ્ર વકીલ આલમ, અમીન સમાજ અને દહેગામ શહેરમાં શોકનું મોજુ ફરી વળ્યું હતું.
આ ગંભીર અકસ્માતના બનાવ અંગે પોલીસે ત્વરિત કાર્યવાહી હાથ ધરીને અજાણ્યા વાહનચાલક સામે તપાસના ચક્રો ગતિમાન કર્યા છે. પ્રાથમિક લોકચર્ચા અને અનુમાનો અનુસાર અકસ્માત સર્જનાર વાહન કોઈ સ્કોર્પીયો ગાડી હોવાની આશંકા વ્યક્ત કરવામાં આવી રહી છે, પોલીસે આસપાસના સીસીટીવી ફૂટેજ અને અન્ય ટેકનિકલ પુરાવાઓના આધારે ફરાર વાહનચાલકને શોધી કાઢવાના પ્રયાસો તેજ કર્યા છે. બીજી તરફ, હોસ્પિટલ ખાતે કાગળોની જરૂરી કાર્યવાહી અને મૃતદેહનું પોસ્ટમોર્ટમ પૂર્ણ કરાવ્યા બાદ પોલીસે અમીન પરિવારને અંતિમ સંસ્કાર માટે મૃતદેહ સુપરત કર્યો હતો.
