કેનેડામાં યોજાયેલી 'એલિસન ઇન્ક્વાયરી' સમક્ષ સાક્ષી તરીકે ઉપસ્થિત રહેલા જાણીતા કાર્ડિયોલોજિસ્ટ ડૉ. પિટર મેકકલોએ વૈશ્વિક સ્તરે હલચલ મચાવી દે તેવા ગંભીર નિવેદનો આપ્યા છે. તેમણે પોતાની સાક્ષીમાં દાવો કર્યો હતો કે વર્લ્ડ હેલ્થ ઓર્ગેનાઈઝેશન અને વૈશ્વિક એજન્સીઓ દ્વારા કરવામાં આવેલું મહામારીનું આયોજન અને રસીકરણની રણનીતિ અચાનક અસ્તિત્વમાં આવી નહોતી, પરંતુ તેની પૂર્વ તૈયારીઓ વર્ષો અગાઉથી ચાલી રહી હતી. તેમના આ નિવેદને તબીબી અને રાજકીય વર્તુળોમાં ભારે ચર્ચા જગાવી છે, જોકે આ દાવાઓને હજુ સુધી કોઈ સત્તાવાર પુષ્ટિ મળી નથી.
વધુ વિગતો આપતા ડૉ. મેકકલોએ આંતરરાષ્ટ્રીય સ્તરના સંશોધનો પર પ્રકાશ પાડ્યો હતો. તેમણે આરોપ લગાવ્યો કે યુનાઇટેડ સ્ટેટ્સ અને ચીન વચ્ચે ઓછામાં ઓછા ૨૦૧૨થી ચાલતા સંશોધન સહયોગના પરિણામે કથિત રીતે SARS-CoV-2 વાયરસનું નિર્માણ થયું હતું. આ ઇતિહાસને યુ.એસ.ના બાયોડિફેન્સ રિસર્ચ સાથે જોડતા તેમણે દાવો કર્યો કે વાયરસના ઉદ્ભવ પાછળ વર્ષ ૨૦૦૪ના સમયગાળાથી ચાલતો યુએસ બાયોવેપન પ્રોગ્રામ પણ ભાગ ભજવતો હતો. જોકે, વૈજ્ઞાનિક સમુદાય અને સત્તાવાર તપાસ એજન્સીઓ દ્વારા આ દાવાઓને અતિશયોક્તિભર્યા અને વિવાદાસ્પદ ગણાવવામાં આવ્યા છે, જેને કોઈ સ્થાપિત તથ્ય તરીકે સ્વીકારી શકાય નહીં.
અહેવાલના અંત ભાગમાં ડૉ. મેકકલોએ રસીકરણ કાર્યક્રમ પર પણ સવાલો ઉઠાવ્યા હતા. તેમણે જણાવ્યું કે mRNA વેક્સિન ટેક્નોલોજી કોવિડ-૧૯ ફાટી નીકળ્યાના વર્ષો પહેલાથી જ વિકસાવવામાં આવી રહી હતી. આ સમગ્ર રસીકરણ અભિયાનને તેમણે "તબીબી ઇતિહાસનો સૌથી મોટો જુગાર" ગણાવ્યો હતો. આ વૈશ્વિક ઘટનાક્રમ પાછળના છૂપા એજન્ડા અને પૂર્વ આયોજન અંગે તેમણે આપેલા આ તથ્યો ભલે ચર્ચાના એરણે ચડ્યા હોય, પરંતુ તબીબી ક્ષેત્રે આ દાવાઓની સત્યતા સામે અત્યારે પણ મોટા પ્રિશ્નાર્થ ચિન્હો લાગેલા છે.
