કેન્સર જેવી ગંભીર બીમારી સામે લડી રહેલા દર્દીઓ અને તેમના પરિવારજનો માટે સરકાર તરફથી એક ખૂબ જ રાહતભર્યા સમાચાર સામે આવ્યા છે. સુપ્રીમ કોર્ટ દ્વારા કેન્સરની દવાઓના આસમાને પહોંચેલા ભાવ સામે લાલ આંખ કરીને કેન્દ્ર સરકારની ઝાટકણી કાઢવામાં આવ્યા બાદ, ડ્રગ પ્રાઇસ રેગ્યુલર એનપીપીએ (નેશનલ ફાર્માસ્યુટિકલ પ્રાઇસિંગ ઓથોરિટી) દ્વારા કેન્સર વિરોધી 543 દવાઓના મહત્તમ રિટેલ ભાવમાં જબરદસ્ત ઘટાડો કરવાનો મોટો નિર્ણય લેવામાં આવ્યો છે. સરકારના આ પગલા પાછળનો મુખ્ય ઉદ્દેશ્ય મોંઘી દવાઓના કારણે પાયમાલ થઈ રહેલા સામાન્ય અને મધ્યમ વર્ગના દર્દીઓને વાજબી અને સસ્તા ભાવે જીવનરક્ષક દવાઓ ઉપલબ્ધ કરાવવાનો છે, જેનો અમલ આગામી દિવસોમાં સમગ્ર દેશમાં શરૂ થઈ જશે.
રસાયણ અને ખાતર મંત્રાલયના ફાર્માસ્યુટિકલ વિભાગની સત્તાવાર યાદી મુજબ, એનપીપીએ દ્વારા કેન્સરની દવાઓના ભાવમાં સીધો 80 થી 90 ટકા સુધીનો ઘટાડો કરી દેવામાં આવ્યો છે. આ અગાઉ 17 ઓક્ટોબરના રોજ 137 કેન્સર વિરોધી દવાઓના ટ્રેડ માર્જિન 30 ટકા સુધી મર્યાદિત કરવાનો નિર્ણય લેવાયો હતો. ફાર્માસ્યુટિકલ કંપનીઓએ 27 ઓક્ટોબર 2026 થી સુધારેલી દવાઓની યાદી મુજબ અમલ કરવાનું શરૂ કરવું પડશે અને 9 નવેમ્બરથી આ નવા ઘટેલા ભાવ સંપૂર્ણપણે લાગુ થઈ જશે. આ ભાવઘટાડા બાદ કેટલીક મુખ્ય દવાઓની કિંમતમાં મોટો ફરક પડ્યો છે, જેમાં આરપીજી લાઇફ સાયન્સિસની ફુલબ્રેકા (5 એમએલ વાયલ)નો ભાવ રૂ. 26,072.16 થી ઘટીને રૂ. 5,491 થઈ ગયો છે. તેવી જ રીતે, એબોટ હેલ્થકેરની બેવાસિજેબ (4 એમએલ વાયલ) જે અગાઉ રૂ. 21,767.70 માં મળતી હતી તે હવે માત્ર રૂ. 5,930.1 માં મળશે. આ ઉપરાંત આરપીજીની જ ઇન્યુટા કેપ્સ્યુલ્સ રૂ. 6,578.20 થી ઘટીને રૂ. 2,232, ડો. રેડ્ડીઝ લેબોરેટરીઝની એઝાસિટિન રૂ. 6,337 થી ઘટીને રૂ. 1,495 અને એનારઝોલની કિંમત પણ રૂ. 695.76 થી ઘટાડીને માત્ર રૂ. 73 કરી દેવામાં આવી છે.
સરકારના આ ક્રાંતિકારી પગલાથી હવે આખા દેશમાં કેન્સરની સારવાર કરાવતા દર્દીઓ ઉપરથી આર્થિક બોજ ઘણો ઓછો થઈ જશે. અત્યાર સુધી જે દવાઓ સામાન્ય લોકોની પહોંચ બહાર હતી અને જેને ખરીદવા માટે ઘરના વેચાણ સુધીના પગલાં લેવા પડતા હતા, તે હવે ખૂબ જ ઓછા અને રાહતદારી ભાવે બજારમાં મળી રહેશે. ફાર્મા કંપનીઓ દ્વારા ટ્રેડ માર્જિનની મર્યાદા નક્કી થવાથી અને સરકારની કડક નજર રહેવાથી ભવિષ્યમાં પણ દવાઓના કૃત્રિમ ભાવ વધારા પર લગામ કસાયેલી રહેશે અને દર્દીઓ વિના વિલંબે પોતાની સારવાર કરાવી શકશે.
