વડાપ્રધાનની વિશેષ ઉપસ્થિતિમાં આગામી ૩૦ ઓક્ટોબરે પી.એમ. કિસાન સમ્માન નિધિના ૨૪મા હપ્તાની રકમ ખેડૂતોના ખાતામાં જમા થવાની છે. આ મહત્વના પ્રસંગને ધ્યાનમાં રાખીને દેશભરની સાથે દેવભૂમિ દ્વારકા જિલ્લામાં પણ ભવ્ય આયોજન કરવામાં આવ્યું છે. જિલ્લા કક્ષા તેમજ દરેક જિલ્લા પંચાયત સીટ દીઠ વિશેષ કાર્યક્રમોનું આયોજન કરાયું છે, જેમાં ખેડૂતો એકત્રિત થઈને વડાપ્રધાનનું લાઈવ ઉદ્બોધન નિહાળશે અને કિસાન દિવસની ઉજવણી કરશે.
આ ભવ્ય આયોજન અંતર્ગત દેવભૂમિ દ્વારકા જિલ્લા કક્ષાનો મુખ્ય કાર્યક્રમ ખંભાળિયાના એ.પી.એમ.સી. ખાતે યોજાશે. આ ઉપરાંત જિલ્લા પંચાયતની જુદી જુદી ૨૨ સીટો અંતર્ગત આવતા ગામો જેવા કે બજાણા, બરડિયા, ભાડથર, ભાટિયા, ભોગાત, ચારબારા, ધરમપુર, ધતુરિયા, ઢેબર, હર્ષદપુર, કલ્યાણપુર, લાંબા, મીઠાપુર, મોટા કાલાવડ, નંદાણા, રાણ, સણખલા, શક્તિનગર, વાડીનાર, વડત્રા, વરવાળા અને વેરાડ વિસ્તારની પ્રાથમિક શાળાઓ, ગ્રામ પંચાયત મેદાનો, સમાજ વાડીઓ તથા ભવન ખાતે પણ ખાસ કાર્યક્રમોનું સત્તાવાર આયોજન કરવામાં આવ્યું છે.
આ તમામ જગ્યાએ યોજાનાર કાર્યક્રમોમાં સ્થાનિક ગામના આગેવાનો અને મોટી સંખ્યામાં ખેડૂતો ઉત્સાહભેર જોડાશે. સરકારની આ યોજના દ્વારા ખેડૂતોને આર્થિક સહાય તો મળવાની જ છે, સાથે સાથે ગામડાઓમાં કિસાન ઉત્સવનું વાતાવરણ ઊભું થશે અને ખેતીલક્ષી યોજનાઓની વિગતો પણ આસાનીથી ખેડૂતો સુધી પહોંચી શકશે.
