વિશ્વની દિગ્ગજ સ્માર્ટફોન ચિપમેકર કંપની ક્વાલકોમ આગામી નવેમ્બર મહિનામાં ફરી એકવાર મોટા પાયે કર્મચારીઓની છટણી કરવા જઈ રહી છે. કંપનીના સીઈઓ ક્રિસ્ટીઆનો એમોન દ્વારા કર્મચારીઓને મોકલવામાં આવેલા આંતરિક મેમોમાં આ બાબતના સ્પષ્ટ સંકેત આપવામાં આવ્યા છે. કન્ઝ્યુમર ઇલેક્ટ્રોનિક્સ માર્કેટમાં ચાલી રહેલા પડકારો વચ્ચે કંપની પોતાના બિઝનેસને નવો આકાર આપવા અને પર્ફોર્મન્સ સુધારવા માટે આ પગલું ભરી રહી છે. સપ્ટેમ્બર 2025ની સ્થિતિએ ક્વાલકોમ કંપનીમાં વૈશ્વિક સ્તરે અંદાજે 52,000 કર્મચારીઓ કામ કરી રહ્યા છે, જેમાંથી કેટલા લોકોને નોકરી ગુમાવવી પડશે તેની સત્તાવાર જાહેરાત હજુ સુધી કંપની દ્વારા કરવામાં આવી નથી.
સીઈઓ ક્રિસ્ટીઆનો એમોને કર્મચારીઓને જણાવ્યું છે કે આ છટણીનો હેતુ મજબૂત પર્ફોર્મન્સ કલ્ચર ઊભું કરવાનો છે અને જ્યાં કંપનીની અપેક્ષાઓ પૂરી નથી થઈ રહી તે ખામીઓને દૂર કરવાની છે. ઉદ્યોગ જગતના અંદાજો મુજબ ભારતમાં ક્વાલકોમના આશરે 20,000 કર્મચારીઓમાંથી 3% થી 6% લોકો નોકરીના જોખમ હેઠળ છે. ઇન્ડસ્ટ્રી એક્સપર્ટ્સના મતે વૈશ્વિક સ્તરે અંદાજે 6% થી 7% કર્મચારીઓનું પ્રમાણ ઘટી શકે છે અને ભારત પર પણ તેની સમાન અસર જોવા મળી શકે છે. જોકે આ આંકડા માત્ર અંદાજિત છે અને કંપનીએ હજુ સુધી કોઈ આંકડાકીય જાહેરાત કરી નથી. ઊંચી મેમરી કિંમતો અને સ્માર્ટફોન માર્કેટની મંદીના કારણે કંપનીને રેવન્યુ મોરચે પણ દબાણનો સામનો કરવો પડી રહ્યો છે.
આ પડકારો સામે લડવા માટે ક્વાલકોમ હવે ડેટા સેન્ટર્સ અને એઆઈ ટેકનોલોજી ક્ષેત્રે પોતાના પગપેસારા વધારી રહી છે જેથી સ્માર્ટફોન માર્કેટ સિવાયના અન્ય બિઝનેસમાંથી પણ આવક ઊભી કરી શકાય. કંપનીનું લક્ષ્ય છે કે નાણાકીય વર્ષ 2027 સુધીમાં સ્માર્ટફોન સિવાયના અન્ય સેક્ટરમાંથી ચિપનું વેચાણ મુખ્ય હિસ્સો બની જાય. અગાઉ 2026ની શરૂઆતથી અત્યાર સુધીમાં કંપની દ્વારા યુએસ માર્કેટમાં નાના સ્તરે છટણીની નોટિસો આપવામાં આવી છે, પરંતુ નવેમ્બરની આ મોટી જાહેરાત બાદ વૈશ્વિક સ્તરે કર્મચારીઓ પર તેની સીધી અસર પડશે. આગામી દિવસોમાં કંપની સત્તાવાર રીતે છટણી અંગેની વિગતો જાહેર કરશે તેવી શક્યતા છે.
