મધ્ય પૂર્વના દરિયાકાંઠે ફરી એકવાર યુદ્ધ જેવું જોખમી વાતાવરણ સર્જાયું છે, જ્યાં ઓમાનના કિનારે હોર્મુઝ સ્ટ્રેટમાં એક વ્સેલ એટલે કે જહાજમાં ભીષણ આગ લાગવાની ઘટના સામે આવી છે. આ ગંભીર બનાવની જાણકારી નજીકમાંથી પસાર થતા એક અન્ય ત્રીજા જહાજના કેપ્ટન દ્વારા આપવામાં આવી હતી, જેના પછી સુરક્ષા એજન્સીઓ સતર્ક થઈ ગઈ છે. ઓમાનના ખાસાબથી 9 નોટિકલ માઈલ એટલે કે આશરે 17 કિલોમીટર ઉત્તર તરફ આ ઘટના બની હોવાના અહેવાલ છે, પરંતુ આગ લાગવાનું ચોક્કસ કારણ કે તે કોઈ હુમલાનું પરિણામ છે કે કેમ તેની હજુ સુધી સત્તાવાર પુષ્ટિ થઈ શકી નથી.
આ દુર્ઘટના બાદ જહાજ પર સવાર ક્રૂ મેમ્બર્સની હાલત શું છે તે હજુ સુધી અજ્ઞાત છે અને હાલ તુરંત કોઈ નુકસાન કે પર્યાવરણને થયેલી અસર અંગેનું કોઈ મૂલ્યાંકન થઈ શક્યું નથી. આ અગાઉ ગત 18 ઓક્ટોબરના રોજ યુએઈના ખોર ફક્કાનપોર્ટ પાસે પણ એક ટગબોટને 2 અજાણ્યા પ્રોજેક્ટાઈલ્સ દ્વારા નિશાન બનાવવામાં આવી હતી, જેમાં જહાજને નુકસાન પહોંચ્યું હતું અને 1 સામાન્ય ઈજાનો બનાવ પણ નોંધાયો હતો. આ ઉપરાંત સાઉદી અરેબિયાના અલ જુબૈલથી 68 નોટિકલ માઈલ ઉત્તરપૂર્વમાં પણ એક ટેન્કર કોઈ અજાણી ચીજવસ્તુથી પ્રભાવિત થયાના અહેવાલો સામે આવ્યા હતા, જે દરિયાઈ સુરક્ષા માટે મોટો ખતરો સાબિત થઈ રહ્યો છે.
આ સતત બની રહેલી ઘટનાઓ વચ્ચે અમેરિકા અને ઈરાન વચ્ચે ચાલી રહેલા તણાવને ડામવા માટે રાજકીય અને કૂટનીતિક પ્રયાસો પણ ચાલી રહ્યા છે. ઈરાનના સર્વોચ્ચ નેતા અયાતુલ્લા સૈયદ મોજબા ખામેનીએ ક્ષેત્રમાં ચાલી રહેલી ન તો યુદ્ધ ન તો શાંતિની સ્થિતિનો અંત લાવવા આહ્વાન કર્યું છે, જ્યારે અમેરિકન પ્રમુખ ડોનલ્ડ ટ્રમ્પે મેડિકલ સપ્લાય સંબંધિત મદદ માટે ઈરાન સાથે સંપર્ક કરવા મંજૂરી આપી દીધી છે. હાલ તો આ વિસ્તારમાંથી પસાર થતા તમામ જહાજોને અત્યંત સાવધાની રાખવા અને કોઈપણ શંકાસ્પદ ગતિવિધિની તાત્કાલિક રિપોર્ટિંગ કરવા માટે ખાસ એડવાઈઝરી જારી કરવામાં આવી છે.
