દેશના નોકરીદાતાઓ માટે એક મોટા રાહતના સમાચાર સામે આવ્યા છે. લેબર અને એમ્પ્લોયમેન્ટ મંત્રાલય દ્વારા એમ્પ્લોયમેન્ટ સ્ટેટ ઇન્સ્યોરન્સ કોર્પોરેશન એટલે કે ESIC અંતર્ગત ચાલતી 'ન્યૂ એમ્નેસ્ટી સ્કીમ 2025' ની મુદતમાં 3 મહિનાનો વધારો કરવામાં આવ્યો છે. હવે આ ખાસ યોજનાનો લાભ લેવા માટેની આખરી તારીખ 31 ડિસેમ્બર નક્કી કરવામાં આવી છે. આ એક વન-ટાઇમ ડિસ્પ્યુટ રેઝોલ્યુશન ઇનિશિયેટિવ છે, જેનો મુખ્ય હેતુ કોર્ટમાં વર્ષોથી પેન્ડિંગ પડેલા કેસોના ભારણને ઘટાડવાનો અને ESI એક્ટ હેઠળ નિયમોનું પાલન સરળ બનાવવાનો છે.
મંત્રાલયના જણાવ્યા અનુસાર, જે કોર્ટ કેસો 31-03-2025 સુધીમાં દાખલ કરવામાં આવ્યા હતા તે તમામ આ યોજના હેઠળ સેટલમેન્ટ માટે પાત્ર બનશે. આ સ્કીમ હેઠળ એમ્પ્લોયરો એડ-હોક અસેસમેન્ટની રકમ માત્ર એક્ચ્યુઅલ કન્ટ્રિબ્યુશન અને વ્યાજ ચૂકવીને કોઈપણ જાતના એડિશનલ ડેમેજ વગર સેટલ કરી શકે છે. આ ઉપરાંત, જે કેસોમાં એમ્પ્લોયર્સે પહેલેથી જ ડ્યુઝ ચૂકવી દીધા છે પરંતુ વિવાદિત ડેમેજના માત્ર 10 ટકા રકમ ચૂકવવાની શરતે તે કેસો પાછા ખેંચવાની છૂટ પણ આપવામાં આવી છે. રેકોર્ડ્સ સમયસર ન જમા કરાવવાના કે પેમેન્ટ મોડા કરવાના જે કેસો ESIC દ્વારા કોર્ટમાં કાનૂની કાર્યવાહી માટે દાખલ થયા હતા, તે પણ કોર્ટની મંજૂરીથી પરત ખેંચી શકાશે.
આ યોજનાના એક્સ્ટેન્શનથી પાત્રતા ધરાવતા તમામ એમ્પ્લોયર્સ અને ઇન્સ્યોર્ડ લોકોને આ સ્કીમનો લાભ લેવા માટે પૂરતો સમય મળી રહેશે. સરકારનું આ પગલું ઇઝ ઓફ ડૂઇંગ બિઝનેસના વ્યાપક લક્ષ્યને મજબૂત બનાવે છે અને નોકરીદાતાઓ માટે બિઝનેસ કરવાનું વધુ સરળ બનાવે છે. કોર્ટની લાંબી કાનૂની લડાઈઓમાંથી મુક્તિ મેળવીને વિવાદોનો નિકાલ લાવવા માટે આ એક ખૂબ જ વ્યવહારુ અને એમ્પ્લોયર-ફ્રેન્ડલી માર્ગ સાબિત થઈ રહ્યો છે.
