સોશિયલ મીડિયા પર રોજ અવનવા વીડિયો વાયરલ થતા હોય છે, પરંતુ હાલમાં એક એવો વીડિયો સામે આવ્યો છે જેને જોઈને સૌ કોઈના શ્વાસ અધ્ધર થઈ ગયા છે. તુર્કીના ઈસ્તાંબુલ શહેરના સુંદર બાસ્ફોર્સ વિસ્તારમાં એક બીચ પર પ્રી-વેડિંગ ફોટોશૂટ ચાલી રહ્યું હતું, જે થોડી જ ક્ષણોમાં એક ભયાનક અકસ્માતમાં ફેરવાતા રહી ગયું હતું. લગ્નની યાદો હંમેશા માટે કેમેરામાં કેદ કરવાના ચક્કરમાં દુલ્હને પોતાના હાથમાં ઢગલાબંધ ફુગ્ગાઓ પકડ્યા હતા. આ શૂટ ખૂબ જ મસ્તી અને ઉત્સાહ સાથે ચાલી રહ્યું હતું, પરંતુ ત્યાં હાજર કોઈ પણ વ્યક્તિએ સપનામાં પણ નહીં વિચાર્યું હોય કે આગળ શું થવાનું છે.
ઘટનાની વિગતો મુજબ, અચાનક જ સમુદ્ર તરફથી ભારે પવન ફૂંકાવાનું શરૂ થયું હતું. ફુગ્ગાઓનો જથ્થો મોટો હોવાના કારણે હવાની તેજ થાપથી તે પેરાશૂટની જેમ કામ કરવા લાગ્યા અને દુલ્હનને જમીન પરથી ઉપર તરફ ખેંચી લીધી હતી. પવન એટલો તોફાની હતો કે દુલ્હન હવામાં લટકતી આગળ તરફ ખેંચાતી ગઈ હતી. આ અચાનક બનેલી ઘટના જોઈને ત્યાં હાજર ફોટોગ્રાફર અને અન્ય લોકો પણ ગભરાઈ ગયા હતા અને તેમની ચીસો નીકળી ગઈ હતી. આ જોખમી ડ્રામાને કારણે તાત્કાલિક ધોરણે આખું ફોટોશૂટ રોકવું પડ્યું હતું.
સદનસીબે, ત્યાં હાજર એક હિંમતવાન વ્યક્તિએ તાત્કાલિક દોડીને દુલ્હનનો હાથ મજબૂતાઈથી પકડી લીધો હતો, જેના કારણે એક મોટી અને ગંભીર દુર્ઘટના ટળી ગઈ હતી. હાલ આ ઘટનાનો વીડિયો સોશિયલ મીડિયા પર આગની જેમ ફેલાઈ રહ્યો છે અને નેટીઝન્સ જાતજાતની કોમેન્ટ્સ કરી રહ્યા છે. લોકો કહી રહ્યા છે કે શોખ ઘણીવાર ભારે પડી શકે છે. એક સોશિયલ મીડિયા યુઝરે સાચું જ કહ્યું છે કે જીવનમાં સ્ટાઈલ અને શોખ પોતાની જગ્યાએ મહત્વપૂર્ણ છે, પરંતુ વ્યક્તિની સલામતી હંમેશા પ્રથમ આવવી જોઈએ.
