જો તમારા પબ્લિક પ્રોવિડન્ટ ફંડ એટલે કે PPF ખાતામાં લાખો રૂપિયા જમા હોય અને સાથે જ આવકવેરાની બાકી લેણી રકમ પણ બાકી હોય, તો એવો પ્રશ્ન થવો સ્વાભાવિક છે કે શું આઈટી વિભાગ તમારી આ બચત જપ્ત કરી શકે છે. વાસ્તવમાં, સમયસર આવકવેરો ચૂકવવામાં ના આવે તો વિભાગ વસૂલાતની કાર્યવાહી શરૂ કરી શકે છે, પરંતુ કાયદો PPF ખાતામાં રહેલી જમા રકમ માટે ચોક્કસ સુરક્ષા પૂરી પાડે છે. જોકે, આ સુરક્ષા ક્યારે લાગુ પડે છે અને કયા સંજોગોમાં વિભાગ તમારા અન્ય બેંક ખાતાઓ અથવા સંપત્તિઓ સામે કાર્યવાહી કરી શકે છે તે સમજવું ખૂબ જ જરૂરી છે, કારણ કે માત્ર PPF ખાતામાં પૈસા હોવાનો અર્થ એ નથી કે તમે તમારી ટેક્સ જવાબદારીઓમાંથી મુક્ત થઈ ગયા છો.
દેશમાં એવી કાયદાકીય જોગવાઈઓ છે જે PPF ખાતામાં જમા રકમને જપ્તી સામે સુરક્ષિત રાખે છે અને બાકી લેણી રકમ વસૂલવા પર પ્રતિબંધો હોઈ શકે છે, પરંતુ કોઈપણ કાર્યવાહીની કાયદેસરતા કેસના ચોક્કસ સંજોગો પર આધાર રાખે છે. ખાસ કરીને જો તમે PPF ખાતામાંથી પૈસા ઉપાડીને સામાન્ય બચત ખાતામાં જમા કરાવો છો, તો તે રકમ સુરક્ષિત રહેતી નથી. ઉદાહરણ તરીકે, જો તમારા ખાતામાં રૂપિયા 10 લાખ હોય અને તેમાંથી રૂપિયા 5 લાખ ઉપાડીને સેવિંગ્સ એકાઉન્ટમાં જમા કરો, તો આ ઉપાડેલી રકમ આવકવેરાની વસૂલાતની કાર્યવાહી હેઠળ આવી શકે છે. આઈટી વિભાગ ટેક્સની વસૂલાત માટે અન્ય બેંક ખાતાઓ, પગાર, શેર, મ્યુચ્યુઅલ ફંડ્સ તેમજ જંગમ અને સ્થાવર મિલકતો સામે પણ પગલાં લઈ શકે છે.
જો તમારી બેંક કે પોસ્ટ ઓફિસ દ્વારા તમારા PPF ખાતા પર કોઈ આદેશ કે સ્થગિત કરવાની કાર્યવાહી કરવામાં આવે, તો સૌથી પહેલા સંબંધિત ઓર્ડરની કોપી મેળવીને સત્તાધિકારી સમક્ષ લેખિતમાં વાંધો નોંધાવો જોઈએ. આ પ્રક્રિયા માટે ખાતાનું સ્ટેટમેન્ટ, ટેક્સ ડિમાન્ડ નોટિસ અને વસૂલાતના દસ્તાવેજો તૈયાર રાખવા જરૂરી છે અને જરૂર પડે તો કોઈ ટેક્સ નિષ્ણાત કે લોયરની મદદ લેવી યોગ્ય રહે છે. ધ્યાનમાં રાખો કે માત્ર મૌખિક કે લેખિત વાંધો નોંધાવવાથી ખાતા પરનો પ્રતિબંધ આપોઆપ દૂર થતો નથી, તેથી નિર્ધારિત નિયમો મુજબ જ કાયદેસરની અપીલ દાખલ કરીને રાહત મેળવી શકાય છે.
