દિલ્હીમાં બુધવારે ટાટા ગ્રુપના મુદ્દે કેન્દ્ર સરકાર અને કોંગ્રેસ વચ્ચે સોશિયલ મીડિયા પર મોટો વિવાદ થયો હતો. લોકસભામાં અપક્ષ લીડર રાહુલ ગાંધીએ સરકાર પર ટાટા ગ્રુપને બરબાદ કરવાનો ગંભીર આરોપ મૂક્યો હતો. જેના જવાબમાં યુનિયન મિનિસ્ટર નિર્મલા સીતારામને રાહુલ ગાંધી પર દેશના બિઝનેસમેન્સમાં અવિશ્વાસ અને નફરત ફેલાવવાનો પલટવાર કર્યો હતો. આ વાતચીત દરમિયાન રાહુલ ગાંધીએ પોતાની એક સોશિયલ મીડિયા પોસ્ટમાં નિર્મલા સીતારામનના નાગની જોડણી જાણી જોઈને ખોટી લખી હતી, જેને લઈને ભાજપના સમર્થકોએ તેમને સોશિયલ મીડિયા પર ઘેર્યા હતા અને જોરશોરથી પ્રતિક્રિયાઓ આપી હતી.
ભાજપના સમર્થકો દ્વારા આ ભૂલ પકડીને હોબાળો મચાવ્યા બાદ ગુરુવારે કોંગ્રેસના પ્રવક્તા સુપ્રિયા શ્રીનાતે આ બાબતે મોટું નિવેદન આપ્યું હતું. તેમણે સોશિયલ મીડિયા પર પોસ્ટ કરીને ભાજપના સમર્થકોની મજાક ઉડાવતા જણાવ્યું કે કમ્યુનિકેશનની દુનિયામાં જાણી જોઈને જોડણીની ભૂલ કરવી એ લોકોને પોતાની તરફ આકર્ષવાની એક ખાસ રણનીતિ હોય છે જેને ટાઈપો માર્કેટિંગ કહેવામાં આવે છે. સુપ્રિયા શ્રીનાતે ભાજપના લોકોને આસાનીથી ફસાઈ જનારા ગણાવ્યા અને રાહુલ ગાંધીની ટાટા ગ્રુપ વાળી પોસ્ટને વાયરલ કરવા બદલ ભાજપના સમર્થકોનો કટાક્ષમાં આભાર માન્યો હતો.
આ સમગ્ર વિવાદની શરૂઆત ટાટા સન્સમાં ચાલી રહેલા લીડરશિપ વિવાદથી થઈ હતી, જેમાં નોએલ ટાટાએ એન ચંદ્રશેખરનની પુનઃ નિમણૂક સામે સવાલો ઉઠાવ્યા છે. રાહુલ ગાંધીએ આ મામલે સરકાર પર આક્ષેપ કર્યો હતો કે દેશના ઉદ્યોગો પ્રાઇમ મિનિસ્ટર નરેન્દ્ર મોદી અને હોમ મિનિસ્ટર અમિત શાહના રમકડા નથી અને બિઝનેસ લીડર્સ ડરના કારણે બોલી શકતા નથી. નિર્મલા સીતારામને આ આરોપોને ફગાવીને કોંગ્રેસ પર ભૂતકાળમાં લાયસન્સ-કોટા રાજ દ્વારા ઉદ્યોગસાહસિકોને દબાવવાનો આક્ષેપ કર્યો હતો. ત્યારબાદ રાહુલ ગાંધીએ ફરીથી પલટવાર કરીને અમિત શાહના રેસિડેન્સ ખાતે થયેલી બેઠકો અને અમુક ચોક્કસ ઉદ્યોગપતિઓને ફાયદો કરાવવાના મુદ્દે સવાલો પૂછ્યા હતા.
