બ્રાઝિલના સેનેટર ફ્લેવિયો બોલસોનારોની ચૂંટણીમાં હાર બાદથી મિયામી પહોંચવા સુધીની 72 કલાકની સફર કોઈ ફિલ્મી ડ્રામાથી કમ નથી રહી. રવિવારે લુઇઝ ઇનાસિયો લુડા દા સિલ્વા સામે પ્રમુખપદની ચૂંટણી હાર્યા બાદ બોલસોનારોએ હાર સ્વીકારવાનો ઇનકાર કરી દીધો હતો અને પરિણામો સામે સવાલો ઉઠાવ્યા હતા. આ દરમિયાન બ્રાઝિલની સુપ્રીમ કોર્ટે કર્પ્શન, મની લોન્ડરિંગ અને ટેક્સ ચોરીની તપાસના મામલે તેમને તેમના રેગ્યુલર અને ડિપ્લોમેટિક પાસપોર્ટ જમા કરાવવાનો કડક આદેશ આપ્યો હતો. જો કે, બોલસોનારોએ પોતાના પરના તમામ આરોપો ફગાવી દીધા હતા અને પાસપોર્ટ જમા કરાવવાની નોટિસ મળ્યા બાદ પણ દેશ છોડવાની વાતથી ઇનકાર કર્યો હતો.
પરંતુ સોમવાર અને મંગળવાર વચ્ચેનો સમય તેમના માટે ભાગદોડભર્યો રહ્યો અને મંગળવારે બપોરે 12 વાગ્યાની ડેડલાઇન પૂરી થતાં જ તેમના અદ્રશ્ય થવાના અહેવાલો સામે આવ્યા. અર્જેન્ટિનાના સત્તાવાર રેકોર્ડ મુજબ 45 વર્ષીય ફ્લેવિયો બોલસોનારો તેમની પત્ની અને બે પુત્રીઓ સાથે મંગળવારે રાત્રે આશરે 10:50 વાગ્યે ટેન્ક્રેડો નેવેસ ઇન્ટરનેશનલ બ્રિજ દ્વારા બ્રાઝિલથી અર્જેન્ટિનામાં દાખલ થયા હતા. ત્યાંથી તેઓ બાયરેસ ફ્લાય એસએ દ્વારા સંચાલિત પ્રાઇવેટ ચાર્ટર ફ્લાઇટમાં ઇક્વાડોરના ગ્વાયાકિલ પહોંચ્યા અને ત્યારબાદ ત્યાંથી ફ્લાઇટ પકડીને બુધવારે સવારે આશરે 10:31 વાગ્યે મિયામીના ઓપા-લોકા એક્ઝિક્યુટિવ એરપોર્ટ પર લેન્ડ થયા હતા. યુએસ અધિકારીઓએ પુષ્ટિ કરી હતી કે તેમને અને તેમના પરિવારને વિઝા જારી કરવામાં આવ્યા છે અને પૂર્વ યુએસ પ્રમુખ ડોનાલ્ડ ટ્રમ્પે પણ તેમના આગમનને સમર્થન આપ્યું હતું.
બ્રાઝિલના વર્તમાન પ્રમુખ લુડાએ બોલસોનારોના આ પ્રકારે દેશ છોડવાની આલોચના કરતા તેને શરમજનક ગણાવ્યો છે, જ્યારે વિરોધીઓ અને સમર્થકો વચ્ચે ભારે ચર્ચા જાગી છે. બોલસોનારોનો 8 વર્ષનો સેનેટનો કાર્યકાળ 2027ની 31 જાન્યુઆરીએ પૂરો થવાનો છે, જેના કારણે સુપ્રીમ કોર્ટની વિશેષ સુરક્ષા પણ સમાપ્ત થવાની હતી. ચૂંટણી પહેલા બ્રાઝિલમાં જ રહીને વિપક્ષનું નેતૃત્વ કરવાની જાહેરાત કરનાર બોલસોનારો માત્ર 3 જ દિવસમાં અર્જેન્ટિના અને ઇક્વાડોરનો સિક્રેટ રૂટ અપનાવીને મિયામી પહોંચી જતા આંતરરાષ્ટ્રીય રાજકારણમાં મોટો વળાંક આવ્યો છે.
