ઉત્તર પ્રદેશના પ્રયાગરાજ જિલ્લામાંથી એક એવા સમાચાર સામે આવ્યા છે જેને જાણીને સામાન્ય લોકોની સાથે પોલીસ પણ ચોંકી ગઈ છે. પ્રયાગરાજમાં એક મકાનની અંદર જમીન ખોદતાં રોકડ રકમથી ભરેલા અનેક ડ્રમ મળી આવવાની ચોંકાવનારી ઘટના પ્રકાશમાં આવી છે. પ્રાથમિક માહિતી અનુસાર આ જમીનમાં દાટવામાં આવેલા ડ્રમમાં કરોડો રૂપિયાની નોટોની થપ્પીઓ છુપાવવામાં આવી હતી. બુધવારે સાંજથી શરૂ થયેલી પોલીસ કાર્યવાહીમાં મોડી રાત સુધી આશરે રૂ. 4 કરોડની ગણતરી થઈ ચૂકી છે અને આ રકમ હજુ વધી શકે છે.
પ્રાપ્ત વિગતો મુજબ આ ઘટના પ્રયાગરાજ જિલ્લાના બરઈપુર રામનગર વિસ્તારની છે. અહીં રહેતી એક વ્યક્તિ અગાઉ મહારાષ્ટ્રના પુણે શહેરમાં આવેલી એક પેઢીમાં નોકરી કરતી હતી. સૂત્રોના દાવા પ્રમાણે નોટબંધીના સમયગાળા દરમિયાન આ વ્યક્તિ મોટી માત્રામાં રોકડ લઈને ફરાર થઈ ગઈ હતી અને પોતાના વતન પરત ફરીને તેણે અનેક વીઘા જમીન ખરીદી હતી. બાકી રહેલી રોકડ રકમ તેણે ડ્રમમાં ભરીને પોતાના મકાનની અંદર જમીનમાં દાટી દીધી હતી. આ સમગ્ર મામલો પડોશી સાથે થયેલા વિવાદ પછી બહાર આવ્યો હતો, જ્યાં થોડા દિવસ પહેલાં થયેલી બોલાચાલી દરમિયાન જમીનમાં રોકડ છુપાવેલી હોવાની વાત પોલીસ સુધી પહોંચી હતી.
ઉચ્ચ અધિકારીઓના આદેશ બાદ પોલીસે બુધવારે રાત્રે મકાનને ઘેરી લઈને શંકાસ્પદ વ્યક્તિની અટકાયત કરી હતી અને તેની નિશાનદેહી પર ખોદકામ શરૂ કરાવ્યું હતું. ખોદકામ દરમિયાન એક પછી એક રોકડ ભરેલા ડ્રમ બહાર આવતા નોટો ગણવા માટે કર્મચારીઓને બોલાવવા પડ્યા હતા. સૂત્રોના જણાવ્યા મુજબ કુલ રકમ રૂ. 60 કરોડથી વધુ હોઈ શકે છે, જોકે પોલીસે હાલ આ આંકડાને સત્તાવાર સમર્થન નથી આપ્યું અને તમામ નોટોની ગણતરી પૂરી થયા પછી જ ચોક્કસ રકમ જાહેર થશે તેમ જણાવ્યું છે. હાલ પોલીસ આટલી મોટી રોકડનો મૂળ સ્ત્રોત શું છે અને તેમાં બીજા કોની સંડોવણી છે તેની ઊંડાણપૂર્વક તપાસ કરી રહી છે.
