વડોદરા શહેરના સંવેદનશીલ અને ગીચ ગણાતા તાંદલજા વિસ્તારમાંથી લોકોના સ્વાસ્થ્ય સાથે સીધા ચેડાં કરતી એક અત્યંત ચોંકાવનારી ઘટના સામે આવી છે. રોજબરોજના નાસ્તા કે ખાવામાં વપરાતી બેકરી આઈટમ્સમાં આ પ્રકારે જીવજંતુઓ નીકળવાથી સ્થાનિક રહીશો અને ગ્રાહકોમાં ભારે આશ્ચર્યની સાથે સાથે રોષ પણ ફેલાઈ ગયો છે. અસ્વચ્છતાના કારણે સામાન્ય જનતાના સ્વાસ્થ્ય સામે ગંભીર જોખમ ઊભું થયું છે.
પ્રાપ્ત વિગતો અનુસાર, તાંદલજાના એક ગ્રાહકે સ્થાનિક બજારમાંથી જાણીતી 'સુપર બેકર્સ' કંપનીનું બ્રેડનું પેકેટ ખરીદ્યું હતું. જ્યારે આ સીલબંધ પેકેટ ખોલવામાં આવ્યું ત્યારે તેની અંદર સ્પષ્ટપણે એક માખી નજરે પડી હતી. આ ઘટના પરથી સાબિત થાય છે કે ફેક્ટરી કે પ્રોસેસિંગ યુનિટમાં બેકરી પ્રોડક્ટ્સ બનાવતી વખતે ફૂડ સેફ્ટી અને સ્વચ્છતાના નિયમોની સરેઆમ ધજાગ ઉડાડવામાં આવી રહી છે.
આ ગંભીર બેદરકારી સામે આવતા જ જાગૃત નાગરિકો અને ગ્રાહકોએ તંત્ર અને સંબંધિત કંપની સામે કડક પગલાં લેવાની માંગ ઉઠાવી છે. આ માખી પેકિંગ યુનિટમાંથી જ પેક થઈને આવી છે કે કેમ તેની ઊંડાણપૂર્વક તપાસ થાય તથા ફૂડ સેફ્ટી વિભાગ દ્વારા તાત્કાલિક દરોડા પાડીને સેમ્પલ લેવામાં આવે તેવી પ્રબળ માંગ છે. જો વહેલી તકે આવી બેદરકાર કંપનીઓ સામે દંડનાત્મક કાર્યવાહી નહીં થાય તો જનહિતમાં ઉગ્ર આંદોલન કરવાની ચીમકી પણ ઉચ્ચારવામાં આવી છે.
