દેશની રાજધાની ન્યુ દિલ્હીમાં બોલિવૂડના દિગ્ગજ અભિનેતા નસીરુદ્દીન શાહ અને કેન્દ્રીય મંત્રી કિરેન રિજિજુ વચ્ચે શાબ્દિક યુદ્ધ છેડાઈ ગયું છે. સોશિયલ મીડિયા પર વાયરલ થયેલા એક વીડિયોમાં અભિનેતા નસીરુદ્દીન શાહે ખુદને દીમાગી નક્સલ અને તુકડે-તુકડે ગેંગનો ભાગ ગણાવ્યા બાદ વિવાદ સર્જાયો છે. આ મામલે આક્રમક બનેલા યુનિયન મિનિસ્ટર કિરેન રિજિજુએ સોશિયલ મીડિયા પ્લેટફોર્મ એક્સ પર પોસ્ટ કરીને અભિનેતા પર આકરા પ્રહારો કર્યા છે અને જણાવ્યું છે કે તેઓ અભિનેતાને માત્ર સામાન્ય માનતા હતા પરંતુ તેઓ ખતરનાક દીમાગી નક્સલ નીકળ્યા.
આ સમગ્ર વિવાદ ત્યારે શરૂ થયો જ્યારે નસીરુદ્દીન શાહનો એક નવો વીડિયો સામે આવ્યો, જેમાં તેઓ જામિયા મિલિયા ઇસ્લામિયા, જંતર મંતર અને મુંબઈમાં થયેલા સ્ટુડન્ટ પ્રોટેસ્ટ્સ તેમજ વિદ્યાર્થી આંદોલનોના સમર્થનમાં નિવેદન આપી રહ્યા છે. વીડિયોમાં અભિનેતા પડકાર ફેંકતા નજરે પડે છે કે જો દેશમાં કોઈ તુકડે-તુકડે ગેંગ હોય તો તે આ નાજાયજ સરકાર છે. તેમણે સરકારને સવાલ કર્યો હતો કે દેશના યુવાનોનું મનોબળ તોડવા, એજ્યુકેશનલ ઇન્સ્ટિટ્યુશન્સ નષ્ટ કરવા અને ડેમોક્રસીને ખતરામાં મૂકવા માટે સરકાર હજુ કેટલું આગળ વધશે? અભિનેતાના આ તેવર બાદ સરકારી વર્તુળોમાં પણ નારાજગી જોવા મળી રહી છે.
કિરેન રિજિજુએ હિન્દીમાં પ્રતિક્રિયા આપતા કહ્યું કે તેમને અભિનેતાનો અસલી ચહેરો બહુ મોડો સમજાયો અને આવા લોકો ભારતીય ડેમોક્રસી માટે અત્યંત હાનિકારક છે. એક સમયે અભિનેતાનું સન્માન કરતા હોવાનું સ્વીકારીને મંત્રીએ સ્પષ્ટ કર્યું કે કોઈ પણ વ્યક્તિ કાયદા કે દેશની સુરક્ષાથી ઉપર નથી હોતી. હાલ તો આ વીડિયો સોશિયલ મીડિયા પર વાયરલ થયા બાદ દેશભરમાં નવી ચર્ચાઓ શરૂ થઈ ગઈ છે અને આગામી દિવસોમાં આ વિવાદ વધુ વકરે તેવી પૂરી શક્યતા દેખાઈ રહી છે.
