આપણામાંથી મોટાભાગના લોકો નારંગી ખાધા પછી તેની છાલને નકામી સમજીને કચરાપેટીમાં ફેંકી દેતા હોય છે, પરંતુ શું તમે જાણો છો કે આ જ છાલ તમારી ત્વચા માટે વરદાન સાબિત થઈ શકે છે? નારંગી માત્ર સ્વાસ્થ્ય માટે જ નહીં પરંતુ સુંદરતા માટે પણ ખૂબ જ ઉપયોગી છે. તેનાથી ત્વચાને કુદરતી નિખાર મળે છે અને શરીર પર આખો દિવસ એક તાજગીભરી સુગંધ જળવાઈ રહે છે. આ ગુણોને ધ્યાનમાં રાખીને હવે તમે બજારમાં મળતા કેમિકલયુક્ત મોંઘા સાબુને અલવિદા કહીને ઘરે જ ત્વચા માટે અત્યંત ફાયદાકારક એવો નેચરલ સાબુ તૈયાર કરી શકો છો. આ સાબુ બનાવવા માટે કોઈ જટિલ પ્રક્રિયા કે મોંઘી વસ્તુઓની જરૂર નથી પડતી, પરંતુ રસોડામાં કે ઘરમાં ઉપલબ્ધ સામાનથી જ તે આસાનીથી બની જાય છે.
ઘરે નારંગીની છાલનો સાબુ બનાવવા માટે સૌપ્રથમ તાજી નારંગીની છાલને બરાબર ધોઈને નાના ટુકડા કરી લો અને તેને મિક્સરમાં થોડું પાણી ઉમેરીને એકદમ ઝીણી પીસી લો. ત્યારબાદ આ મિશ્રણને ચાળણી કે સુતરાઉ કપડાથી ગાળીને સ્મૂથ લિક્વિડ તૈયાર કરી લો. હવે ડબલ બોઈલર પદ્ધતિનો ઉપયોગ કરીને સાબુના બેઝને ધીમી આંચ પર ઓગાળી લો. જ્યારે બેઝ સંપૂર્ણપણે પ્રવાહી બની જાય ત્યારે તેમાં નારંગીની છાલનું તૈયાર કરેલું મિશ્રણ ઉમેરીને લગભગ ૧૨ થી ૧૩ મિનિટ સુધી સતત હલાવતા રહીને મધ્યમ આંચ પર પકાવો. આ મિશ્રણમાં કોઈ ગાંઠ ન રહે તેનું ખાસ ધ્યાન રાખવું પડે છે.
સંપૂર્ણ મિશ્રણ તૈયાર થઈ ગયા બાદ તેને સિલિકોન મોલ્ડમાં અથવા મોલ્ડ ઉપલબ્ધ ન હોય તો પેપર કપમાં ભરીને આશરે અડધો કલાક માટે રૂમના તાપમાને સેટ થવા દો, અથવા ઝડપથી જમાવવા માટે ફ્રિજમાં પણ રાખી શકો છો. સરસ રીતે જામી ગયા પછી મોલ્ડમાંથી સાબુને બહાર કાઢતાની સાથે જ તમારો ઓર્ગેનિક અને સુગંધિત સાબુ ઉપયોગ માટે તૈયાર થઈ જાય છે. રોજિંદા સ્નાનમાં આ સાબુનો ઉપયોગ કરવાથી ત્વચા પર કુદરતી ચમક આવે છે અને શરીર આખો દિવસ મહેકતું રહે છે. જો કે, ત્વચાની પ્રકૃતિ અલગ-અલગ હોવાથી કોઈપણ નવા ઘરગથ્થુ નુસ્ખા કે સાબુનો ઉપયોગ કરતા પહેલા પેચ ટેસ્ટ અવશ્ય કરવો અથવા ત્વચા નિષ્ણાતની સલાહ લેવી હિતાવહ છે.
