ગુરુવારે સવારના સત્રમાં ભારતીય ઇક્વિટી બેન્ચમાર્કની શરૂઆત બહુ ઉત્સાહજનક તો નહીં પણ સાધારણ લીલા નિશાન સાથે થઈ હતી. વૈશ્વિક બજારમાંથી મળી રહેલા મિશ્ર સંકેતોની સીધી અસર આપણા શેરબજાર પર જોવા મળી રહી છે, જેને કારણે રોકાણકારો અત્યારે કોઈ મોટો જુગાર રમવાને બદલે જોઈ-જાણીને આગળ વધવાની રણનીતિ અપનાવી રહ્યા છે. બજાર ખુલતી વખતે જ રોકાણકારો અને ટ્રેડર્સની નજર સ્ક્રીન પર ચોંટેલી હતી કારણ કે ગ્લોબલ માર્કેટમાં કોઈ સ્પષ્ટ દિશા દેખાઈ રહી નહોતી.
આજના કારોબારની શરૂઆતની વાત કરીએ તો, સેન્સેક્સ 60 પ્લૉઇન્ટ્સના સામાન્ય ઉછાળા સાથે ખૂલ્યો હતો, જ્યારે બીજી બાજુ નિફ્ટી માત્ર 5 પૉઇન્ટ્સ વધીને ટ્રેડ થઈ રહ્યો હતો. બજારની આ ફ્લેટ ચાલ સૂચવે છે કે મોટા ખેલાડીઓ અત્યારે કોઈ મોટી ઉથલપાથલ કરવાના મૂડમાં નથી. આ સાથે જ કરન્સી માર્કેટમાં પણ થોડી હલચલ જોવા મળી હતી જ્યાં યુએસ ડૉલર સામે ભારતીય રૂપિયો 5 પૈસા મજબૂત થઈને 95.17 ના સ્તરે ખૂલ્યો હતો, જ્યારે અગાઉના દિવસનું બંધ સ્તર 95.22 પ્રતિ ડૉલરનું હતું.
આગામી સમયમાં બજારની દિશા સંપૂર્ણપણે વૈશ્વિક સંકેતો અને વિદેશી રોકાણકારોની ચાલ પર નિર્ભર રહેશે. નિષ્ણાતો માને છે કે જ્યાં સુધી કોઈ મોટા ગ્લોબલ ન્યૂઝ કે આર્થિક ડેટા સામે નહીં આવે, ત્યાં સુધી બજારમાં આજની જેમ જ સાવચેતીભર્યો માહોલ જળવાઈ રહેશે. રોકાણકારોએ અત્યારે કોઈપણ ઉતાવળિયા નિર્ણયો લેવાને બદલે મજબૂત ફંડામેન્ટલ્સવાળા શેરો પર જ નજર રાખવી હિતાવહ રહેશે.
