આણંદ જિલ્લામાં લાંબા સમયથી પોતાની ફરજ બજાવી રહેલા કલેક્ટર પ્રવિણ ચૌધરીની બદલી થતા સમગ્ર કલેક્ટર કચેરીમાં એક લાગણીસભર માહોલ જોવા મળ્યો હતો. અહીંના કર્મચારીઓ અને અધિકારીઓએ પોતાના વડાને ખૂબ જ અનોખી અને યાદગાર વિદાય આપવાનું નક્કી કર્યું હતું. જિલ્લા કલેક્ટર કચેરીના તમામ નાના-મોટા કર્મચારીઓ પોતાના લોકપ્રિય સાહેબને વિદાય આપવા માટે આતુરતાથી ઊભા હતા અને આખો માહોલ એક પરિવાર જેવો બની ગયો હતો.
આણંદ કલેક્ટર તરીકે પ્રવિણ ચૌધરીએ 25 સપ્ટેમ્બર 2023 ના રોજ પદભાર સંભાળ્યો હતો અને અંદાજે 3 વર્ષ સુધી સફળતાપૂર્વક પોતાની સેવાઓ આપી હતી. જ્યારે તેઓ પોતાની કેબિનમાંથી બહાર આવ્યા, ત્યારે બંને બાજુ લાઈનમાં ઊભેલા મામલતદારો, નાયબ મામલતદારો, ક્લાર્ક, તલાટીઓ તેમજ નિવાસી અધિક કલેક્ટર લલીતકુમાર પટેલ અને અધિક કલેક્ટર રાહુલ ગમારા સહિતના અધિકારીઓએ તેમના પર પુષ્પવર્ષા શરૂ કરી દીધી હતી. તેઓ જ્યાં સુધી પોતાની ગાડીમાં બેઠા નહીં ત્યાં સુધી કર્મચારીઓ ફૂલો વરસાવતા રહ્યા હતા અને પોતાના સાહેબ પ્રત્યેનો પ્રેમ વ્યક્ત કર્યો હતો, જેને જોઈને પ્રવિણ ચૌધરી પણ ખૂબ જ ભાવવિભોર થઈ ગયા હતા.
આ ભવ્ય વિદાય સમારોહમાં વહીવટી તંત્રના દિગ્ગજ ચહેરાઓ પણ ખાસ ઉપસ્થિત રહ્યા હતા. મહાપાલિકાના કમિશ્નર આર.એન ડોડિયા, જિલ્લા વિકાસ અધિકારી દેવાહુતી, જિલ્લા પોલીસ અધિક્ષક ગૌરવ જસાણી અને પ્રાંત અધિકારી અંજલી ઠાકુર સહિતના વરિષ્ઠ અધિકારીઓએ હાજર રહીને પ્રવિણ ચૌધરીના આણંદના કાર્યકાળને યાદ કર્યો હતો અને તેમને ભવિષ્યની જવાબદારીઓ માટે શુભેચ્છાઓ પાઠવી હતી.
