ગાંધીનગર જિલ્લાના કલોલ શહેરમાં તહેવારોની મોસમ શરૂ થતાં જ ચોરો સક્રિય થઈ ગયા છે અને વેપારીઓમાં ફફડાટ વ્યાપી ગયો છે. શહેરના ખૂબ જ વ્યસ્ત ગણાતા રિલિફ શોપિંગ સેન્ટરમાં આવેલી 'ભગવતી ગોલ્ડ' નામની સોના-ચાંદીના દાગીના વેચતી દુકાનને તસ્કરોએ રાત્રિના સમયે નિશાન બનાવી હતી. દુકાનના શટર અને દરવાજાના તાળા તોડીને અંદર પ્રવેશેલા ચોરોએ તહેવારો ટાણે જ લાખો રૂપિયાની ચોરી કરી પોલીસ પેટ્રોલિંગ સામે ગંભીર સવાલો ખડા કરી દીધા છે.
આ ચોરીની ઘટનામાં તસ્કરો દુકાનમાંથી અંદાજે રૂ. 10 લાખની કિંમતના સોના-ચાંદીના કિંમતી દાગીના અને રૂ. 1.50 લાખ રોકડા મળીને કુલ રૂ. 11,50,000 ની મત્તા ઉઠાવી ગયા છે. દિવાળી જેવા મોટા તહેવારો નજીક હોવાથી બજારમાં ખરીદીનો માહોલ હોય છે અને આવા સમયે દુકાનોને નિશાન બનાવવાની ઘટનાથી વેપારીઓમાં ભારે ચિંતા અને રોષ જોવા મળી રહ્યો છે. રાત્રિના સમયે પૂરતું નાઈટ પેટ્રોલિંગ ન હોવાને કારણે જ તસ્કરો બેખોફ બનીને આવી ઘટનાઓને અંજામ આપી રહ્યા છે તેવું વેપારીઓનું માનવું છે.
બનાવની જાણ થતાં જ કલોલ પોલીસ સ્ટેશનનો કાફલો તાત્કાલિક ઘટના સ્થળે દોડી આવ્યો હતો અને મામલાની ગંભીરતાને ધ્યાનમાં રાખીને ડોગ સ્કવોડ તેમજ એફએસએલની ટીમને બોલાવી વૈજ્ઞાનિક ઢંગથી પુરાવા એકત્ર કર્યા હતા. પોલીસે શોપિંગ સેન્ટર અને આસપાસના વિસ્તારના સીસીટીવી ફૂટેજ કબજે કરીને તસ્કરો કયા વાહનમાં આવ્યા હતા અને કઈ તરફ નાસી છૂટ્યા તેની તપાસ શરૂ કરી છે. હાલ તો પોલીસે ગુનો નોંધીને ફરાર થઈ ગયેલા તસ્કરોને ઝડપી પાડવા માટે ચક્રો ગતિમાન કર્યા છે.
