તામિલનાડુના રાણિપેટ શહેરમાંથી એક અત્યંત ચોંકાવનારી ઘટના સામે આવી છે, જ્યાં ફૂટપાથ પર પોતાના માતા-પિતા સાથે ગાઢ નિંદ્રામાં સૂતેલી એક વર્ષની માસૂમ બાળકીનું રહસ્યમય સંજોગોમાં અપહરણ થઈ ગયું હતું. આ ઘટના ગત 23 સપ્ટેમ્બરના રોજ રાત્રે બની હતી, જ્યારે પ્લાસ્ટિકની બોટલો વીણવાનું અને ભીખ માગવાનું કામ કરીને ગુજરાન ચલાવતો ગરીબ દંપતી રાણિપેટના માણિકમ નગર વિસ્તારમાં ફૂટપાથ પર સૂઈ ગયો હતો. રાત્રે અસહ્ય થાકને કારણે માતા-પિતા ઊંઘી ગયા હતા અને બીજા દિવસે સવારે લગભગ 1 વાગ્યે જ્યારે તેમની આંખ ખુલી, ત્યારે તેમની દીકરી ત્યાં હાજર નહોતી. બાળકી અચાનક ગાયબ થઈ જવાથી માતા-પિતાના હોશ ઉડી ગયા હતા અને તેમણે તાત્કાલિક સિપકોટ પોલીસ સ્ટેશનમાં અપહરણની ફરિયાદ નોંધાવી હતી.
આ ગંભીર મામલાને ધ્યાનમાં રાખીને રાણિપેટ ડિસ્ટ્રિક્ટ પોલીસે તાત્કાલિક 5 સ્પેશિયલ ટીમો બનાવીને તપાસ શરૂ કરી દીધી હતી. પોલીસ ટીમોએ ઘટનાસ્થળ અને આસપાસના રસ્તાઓ પર લાગેલા 100થી વધુ CCTV કેમેરાના ફૂટેજ ઝીણવટપૂર્વક તપાસ્યા હતા અને ટેક્નિકલ સર્વેલન્સની મદદ લીધી હતી. પોલીસ તપાસમાં બહાર આવ્યું કે આંધ્રપ્રદેશના રેણિગુન્ટાની રહેવાસી મલ્લીેશ્વરી નામના સંતાનવિહોણા મહિલાએ વાલાજાહની રહેવાસી પોતાની ફ્રેન્ડ બી કૌશલ્યા (ઉંમર 35) પાસે બાળક મેળવવાની ઇચ્છા વ્યક્ત કરી હતી. કૌશલ્યાએ આ વાત તેના પતિ ડી ભૂપતિ (ઉંમર 42) અને પડોશી આર સંતોષ (ઉંમર 45) સાથે શેર કરી હતી. ત્યારબાદ સંતોષ અને તેના ફ્રેન્ડ એમ કુમરણ (ઉંમર 30)એ મળીને ફૂટપાથ પર સૂતેલી માસૂમ બાળકીનું અપહરણ કર્યું હતું અને તેને મલ્લીેશ્વરીને સોંપી દીધી હતી.
પોલીસે આ ટેક્નિકલ અને હ્યુમન ઇન્ટેલિજન્સના આધારે આંધ્રપ્રદેશમાં દરોડા પાડીને રેણિગુન્ટાથી બાળકીને હેમખેમ રેસ્ક્યુ કરી લીધી અને તેને પરિવારને સોંપી દીધી છે. પોલીસે આ કેસમાં માસ્ટરમાઇન્ડ મલ્લીેશ્વરી, બી કૌશલ્યા, ડી ભૂપતિ, આર સંતોષ અને એમ કુમરણ સહિત તમામ 5 આરોપીઓની ધરપકડ કરી લીધી છે. પોલીસ પૂછપરછમાં એ વાત પણ સામે આવી છે કે આ સમગ્ર કાવતરું ખૂબ જ આયોજનબદ્ધ રીતે ઘડવામાં આવ્યું હતું. હાલ પોલીસે આ માનવ તસ્કરી કે ચાઇલ્ડ ટ્રાફિકિંગના મોટા રેકેટ પાછળ અન્ય કોઈ સંડોવણી છે કે નહીં તે દિશામાં પણ ઊંડાણપૂર્વક તપાસ શરૂ કરી દીધી છે.
