ગુજરાત સરકાર દ્વારા રાજ્યના વહીવટી તંત્રને વધુ પારદર્શક, ભ્રષ્ટાચાર મુક્ત અને લોકભિમુખ બનાવવા માટે 'ઓપરેશન ગંગાજળ' અભિયાન અંતર્ગત અત્યંત સખત પગલાં લેવામાં આવી રહ્યા છે. મુખ્યમંત્રી ભૂપેન્દ્ર પટેલની અધ્યક્ષતામાં પંચાયત વિભાગના લાપરવાહ અને ભ્રષ્ટ અધિકારીઓ સામે સરકાર દ્વારા લાલ આંખ કરવામાં આવી છે. લાંબા સમયથી ચાલતી ફરિયાદો અને ઊંડી તપાસના અંતે સરકારે આ બે સિનિયર અધિકારીઓને ફરજિયાત નિવૃત્તિ આપીને વહીવટી બેડામાં સ્પષ્ટ સંદેશો આપી દીધો છે કે પ્રજાના કામોમાં કોઈ જ બેદરકારી ચલાવી લેવામાં આવશે નહીં.
પ્રાપ્ત વિગતો અનુસાર, બોટાદ જિલ્લાના રાણપુર તાલુકા વિકાસ અધિકારી (TDO) એચ.એફ. ભૂવાતરા અને ભાવનગર જિલ્લાના સિહોરના તાલુકા વિકાસ અધિકારી એમ.પી. રાવ સામે વહીવટી અનિયમિતતાઓ અને ભ્રષ્ટાચારના ગંભીર આક્ષેપો સાબિત થયા હતા, જેના પગલે તેમને ફરજિયાત નિવૃત્ત કરવામાં આવ્યા છે. આ અભિયાન હેઠળ અત્યાર સુધીમાં આશરે 85 જેટલા અધિકારીઓ સામે લાલ આંખ કરીને કડક કાર્યવાહી કરવામાં આવી ચૂકી છે, જે હાલ સમગ્ર વહીવટી તંત્રમાં ચર્ચાનો મુખ્ય વિષય બન્યો છે.
રાજ્ય સરકારની આ ઝીરો ટોલરન્સ નીતિ અને ઝંઝાવાતી કાર્યવાહીના કારણે સરકારી કચેરીઓમાં બેસીને પ્રજાના કામોમાં ગેરરીતિ આચરતા તત્વોમાં ભારે ફફડાટ મચી ગયો છે. આગામી સમયમાં પણ આ પ્રકારની તપાસ અને ફરજિયાત નિવૃત્તિનો સિલસિલો સતત ચાલુ રહેશે તેવા સ્પષ્ટ સંકેતો મળી રહ્યા છે. સરકારના આ કડક પગલાંથી સામાન્ય પ્રજામાં વહીવટી તંત્ર પ્રત્યેનો વિશ્વાસ વધુ દ્રઢ બન્યો છે અને પ્રમાણિકપણે ફરજ બજાવતા કર્મચારીઓમાં પણ સારો એવો ઉત્સાહ જોવા મળી રહ્યો છે.
