વેદાંતા ગ્રૂપના ચેરમેન અનિલ અગ્રવાલે બુધવારે કોલકાતા ખાતે રાજ્યમાં મોટા પાયે રોકાણ કરવાની જાહેરાત કરીને સૌનું ધ્યાન ખેંચ્યું છે. તેમણે જણાવ્યું હતું કે વેદાંતા પશ્ચિમ બંગાળમાં પાવર જનરેશન ફેસિલિટી અને એલ્યુમિનિયમ સ્મેલ્ટર પ્લાન્ટ ઊભો કરવા માટે 70000 થી 80000 કરોડનું જંગી રોકાણ કરવાનું વિચારી રહી છે. આ પ્રસ્તાવિત પ્રોજેક્ટ્સ સરકારના સહકાર અને ફિઝિબિલિટી સ્ટડીને આધીન રહીને આગામી 3 વર્ષની અંદર જ ધમધમતા થઈ શકે છે, જે રાજ્યના ઔદ્યોગિક વિકાસ માટે મોટો સીમાચિહ્ન સાબિત થશે.
આ પ્રોજેક્ટ્સ માટે કંપની દ્વારા આસનસોલ વિસ્તારને સંભવિત સ્થળ તરીકે ધ્યાનમાં લેવામાં આવ્યો છે કારણ કે ત્યાં પૂરતા પ્રમાણમાં કોલસો અને જરૂરી ઇન્ફ્રાસ્ટ્રક્ચર ઉપલબ્ધ છે. વેદાંતા પાસે આ વિસ્તારમાં અંદાજે 300 એકર જમીન પહેલેથી જ ઉપલબ્ધ છે, જોકે જરૂર પડ્યે વધારાની જમીનની પણ ફાળવણી થઈ શકે છે. મુખ્યમંત્રી સાથેની બેઠક બાદ અનિલ અગ્રવાલે સ્પષ્ટ કર્યું હતું કે ઓડિશાના ઝારસુગુડા પ્લાન્ટથી રેલવે કનેક્ટિવિટી દ્વારા એલ્યુમિનિયમ બનાવવા માટેનું કાચું મટીરિયલ એલ્યુમિના સરળતાથી મંગાવી શકાશે. આ રોકાણ માત્ર મોટા પ્રોજેક્ટ્સ પૂરતું સીમિત નહીં રહે, પરંતુ સ્થાનિક સાહસિકો પણ 5 કરોડથી 50 કરોડ સુધીનું રોકાણ કરીને ડાઉનસ્ટ્રીમ ઇન્ડસ્ટ્રીઝ સ્થાપી શકશે.
હાલમાં આ આખો પ્લાન્ટ પ્રાથમિક અને ફિઝિબિલિટીના સ્ટેજ પર છે અને આખરી નિર્ણય લેતા પહેલાં પાણી, કોલસો અને સમયસર સરકારી પરવાનગીઓ મેળવવા પર ખાસ ધ્યાન આપવામાં આવશે. અનિલ અગ્રવાલે રાજ્ય સરકાર પાસે આ પ્રોજેક્ટ્સને પોતાના ગણીને સક્રિય ટેકો આપવા અપીલ કરી છે જેથી કામગીરી ઝડપથી આગળ વધી શકે. આ પ્રોજેક્ટ્સ સાકાર થવાથી પશ્ચિમ બંગાળના યુવાનો માટે રોજગારીના દરવાજા ખુલશે અને રાજ્યની પ્રતિભા તથા બિઝનેસ ક્ષમતાનો પૂરેપૂરો ઉપયોગ થઈ શકશે.
