શિયાળો શરૂ થતાં જ બજારમાં તાજા ગાજર મળવા લાગે છે અને ગાજરનો હલવો કે સલાડ ખાવાની મજા જ અલગ હોય છે. જો તમે પણ બજારના કેમિકલયુક્ત ગાજર ખાવાને બદલે ઘરમાં જ એકદમ ઓર્ગેનિક ગાજર ઉગાડવા માંગતા હોવ, તો આ કામ બિલકુલ અઘરું નથી. થોડી કાળજી રાખીને તમે તમારી બાલ્કનીમાં જ ગાજરનો મબલખ પાક મેળવી શકો છો. ભારતમાં ઓક્ટોબરથી નવેમ્બરનો સમય ગાજર વાવવા માટે સૌથી શ્રેષ્ઠ માનવામાં આવે છે, કારણ કે આ પાક ઠંડા વાતાવરણમાં ખૂબ જ સારો એવો ખીલે છે. ગાજરના છોડને રોજના ઓછામાં ઓછા 6 કલાક તડકો મળે તેવી જગ્યાની જરૂર પડે છે. જો તમે કૂંડામાં ગાજર ઉગાડવા માંગતા હોવ, તો ખાસ ધ્યાનમાં રાખો કે કૂંડું ઓછામાં ઓછું 12 ઇંચ ઊંડું હોવું જોઈએ, કારણ કે ગાજરનું મૂળ જમીનની અંદર લાંબું ઉતરે છે.
ગાજર ઉગાડતી વખતે માટીની પસંદગી સૌથી મોટો ભાગ ભજવે છે. જો માટીમાં પથ્થર કે મોટા ગઠ્ઠા હશે તો ગાજર વાંકાચૂકા થઈ જશે અથવા બે ભાગમાં વહેંચાઈ જશે. તેથી કૂંડામાં છૂટી અને પાણી સહેલાઈથી નીકળી જાય તેવી ભુરભુરી માટી ભરો, જેમાં બગીચાની માટી સાથે કમ્પોસ્ટ અને રેતી કે કોકોપીટ મિશ્ર કરી શકાય. જો જમીનમાં વાવવું હોય તો 10 થી 12 ઇંચ ઊંડી માટી ખોદીને પથ્થરો કાઢી નાખવા. ગાજરના બીજ ખૂબ નાના હોવાથી તેને ફેરબદલ ન કરતા સીધા જ કૂંડા કે ક્યારીમાં છાંટીને અડધો સેન્ટીમીટર માટીનું પાતળું પડ ચઢાવી દેવું અને હળવું પાણી આપવું. વાતાવરણ મુજબ બીજને ઉગવામાં 1 થી 3 અઠવાડિયાનો સમય લાગે છે. ગાજરના છોડને સતત ભેજની જરૂર રહે છે, તેથી એકસાથે ઘણું પાણી રેડવા કરતાં નિયમિત રીતે થોડું-થોડું પાણી આપવું જરૂરી છે.
માટી લાંબા સમય સુધી સૂકી રહે અને પછી અચાનક વધારે પાણી અપાય તો ગાજર ફાટી જવાની શક્યતા રહે છે, અને કૂંડાની માટી જલ્દી સૂકાતી હોવાથી તેમાં ભેજ નિયમિત તપાસતા રહેવું. સામાન્ય રીતે ગાજરનો પાક તૈયાર થવામાં 60 થી 90 દિવસ જેટલો સમય લાગે છે. જ્યારે ગાજર યોગ્ય કદના થઈ જાય ત્યારે તેની આસપાસની માટી હળવી કરીને તેને કાળજીપૂર્વક ખેંચીને બહાર કાઢી લેવા. આમ, કોઈ પણ વ્યાવસાયિક ખેડૂત વગર ઘરની સામાન્ય જગ્યામાં જ તમે શુદ્ધ અને તાજા ગાજર મેળવીને તમારા પરિવારના સ્વાસ્થ્યનું ધ્યાન રાખી શકો છો.
