દિવાળી જેવા આગામી મોટા તહેવારોમાં મુસાફરોની સલામત મુસાફરી સુનિશ્ચિત કરવા માટે રાજકોટ એસ.ટી. વિભાગ દ્વારા એક અચાનક સ્પેશિયલ આલ્કોહોલ ડ્રાઈવનું આયોજન કરવામાં આવ્યું હતું. તહેવારોના આ દિવસોમાં બસોમાં ભારે ભીડ રહેતી હોય છે અને હજારો મુસાફરો સફર કરતા હોય છે, ત્યારે પ્રવાસીઓની સુરક્ષા સર્વોપરી રહે તે હેતુથી આ મહત્ત્વનું પગલું ભરવામાં આવ્યું છે. આ સરપ્રાઈઝ ચેકિંગ દરમિયાન રાજકોટ ડેપોના જ એક ડ્રાઇવર નશાની હાલતમાં પકડાઈ જતાં એસ.ટી. તંત્રમાં ભારે દોડધામ મચી ગઈ હતી અને સવાલો પણ ઉભા થયા હતા કે મુસાફરોના જીવ સાથે આ રીતે કેમ ચેડા થઈ શકે છે.
આ સરપ્રાઈઝ ડ્રાઇવ દરમિયાન એસ.ટી. વિભાગની ટીમે કુલ 30 જેટલા ડ્રાઇવર અને કંડક્ટર કર્મચારીઓનું આલ્કોહોલ ટેસ્ટિંગ કર્યું હતું. આ કડક ચેકિંગ દરમિયાન યુવરાજસિંહ ગોહિલ નામનો એસ.ટી. ડ્રાઇવર નશાની હાલતમાં હોવાનું સામે આવ્યું હતું. રાહતની વાત એ રહી કે આ ડ્રાઇવર મુસાફરોથી ભરેલી બસ લઈને રસ્તા પર નીકળે અને કોઈ ગંભીર અકસ્માત સર્જાય, તે પહેલા જ ચેકિંગ દરમિયાન તેનો આલ્કોહોલ ટેસ્ટ પોઝિટિવ આવી ગયો હતો. તંત્રની સતર્કતાના કારણે સમયસર આ પોલ ખુલી ગઈ અને એક મોટો અકસ્માત ટળી જવાથી મોટી હોનારત અટકી હતી.
આ ગંભીર પ્રકારની બેદરકારી સામે આવ્યા બાદ એસ.ટી. વિભાગ દ્વારા આરોપી ડ્રાઇવર યુવરાજસિંહ ગોહિલ સામે કડક વિભાગીય અને શિસ્તભંગના પગલાં લેવાની કાર્યવાહી હાથ ધરવામાં આવી છે. વિભાગીય સૂત્રોના જણાવ્યા મુજબ, મુસાફરોના જીવ જોખમમાં મૂકવા બદલ આ ડ્રાઇવરને નોકરીમાંથી સીધા જ ડિસમિસ કરવામાં આવે તેવી પૂરી શક્યતા છે. તહેવારો દરમિયાન મુસાફરો પોતાના વતન કે ઘરે હેમખેમ અને સુરક્ષિત પહોંચી શકે તે માટે એસ.ટી. તંત્ર દ્વારા આગામી દિવસોમાં પણ આવા ચેકિંગ અભિયાનો સતત ચાલુ રાખવામાં આવશે તેવી ખાતરી આપવામાં આવી છે.
