કેન્દ્ર સરકાર હેઠળ આવતી સરકારી કંપનીઓ એટલે કે CPSEsના કર્મચારીઓ અને અધિકારીઓ માટે મોંઘવારી ભથ્થામાં મોટો વધારો કરવામાં આવ્યો છે. નાણાં મંત્રાલયના પબ્લિક એન્ટરપ્રાઇઝિસ ડિપાર્ટમેન્ટે આ અંગે એક ઓફિસ મેમોરેન્ડમ બહાર પાડીને ઇન્ડસ્ટ્રિયલ ડિયરનેસ અલાઉન્સ એટલે કે IDAના નવા દરોની જાહેરાત કરી છે. અગાઉ આ દર 55.7 ટકા હતો, જે હવે વધારીને 59.1 ટકા કરી દેવામાં આવ્યો છે અને આ નવો ફેરફાર 1 ઓક્ટોબર, 2026થી અમલમાં આવી ગયો છે. આ નિર્ણયથી ONGC, SAIL અને BHEL જેવી મોટી સરકારી કંપનીઓમાં કામ કરતા હજારો કર્મચારીઓને સીધો આર્થિક ફાયદો મળશે.
આ નવા આદેશ મુજબ જુદા જુદા પે-સ્કેલ મુજબ DAના દરો અલગ-અલગ રહેશે. જે કર્મચારીઓ 2017ના પે-સ્કેલ હેઠળ આવે છે તેમને 59.1 ટકા DA મળશે, જ્યારે 2007ના પે-સ્કેલવાળા કર્મચારીઓ માટે આ દર 249.2 ટકા અને 1997ના પે-સ્કેલવાળા માટે 489.5 ટકા રહેશે. આ ઉપરાંત 1987ના પે-સ્કેલ ધરાવતા એક્ઝિક્યુટિવ્સને સરેરાશ AICPIના આધારે આશરે 18,728 રૂપિયા સુધીનું DA મળી શકે છે. જૂની પદ્ધતિ મુજબ આ વધારામાં 215 પોઇન્ટ અથવા 430 રૂપિયાનો વધારો જોવા મળ્યો છે. આ લાભ બોર્ડ લેવલના પદો, તેનાથી નીચેના પદો અને નોન-યુનિયનાઇઝ્ડ સુપરવાઇઝર્સને મળશે.
સામાન્ય સરકારી કર્મચારીઓને અપાતા DA કરતા CPSE કર્મચારીઓનું IDA અલગ હોય છે જ્યાં કેન્દ્ર સરકારના કર્મચારીઓનું DA દર 6 મહિને રિવાઇઝ થાય છે, ત્યાં IDA દર 3 મહિને બદલાય છે. સરકારના તમામ મંત્રાલયો અને ડિપાર્ટમેન્ટ્સને સૂચના આપવામાં આવી છે કે તેઓ પોતાના હેઠળ આવતી તમામ CPSE કંપનીઓને આ નવા નિયમની જાણ કરે જેથી સમયસર કર્મચારીઓને વધેલા ભથ્થાનો લાભ મળી શકે. આ ગણતરી સામાન્ય રીતે સરેરાશ AICPIના આધારે ફોર્મ્યુલા મુજબ કરવામાં આવે છે.
