સામાન્ય રીતે સાપને જમીન પર સરકીને ચાલતા જ આપણે જોયા છે, પરંતુ વિજ્ઞાનીઓએ સાઉથઈસ્ટ એશિયામાં એક એવી અદભુત ઘટના નોંધી છે જેને જોઈને સૌ કોઈ દંગ રહી ગયા છે. ડ્વાર્ફ રીડ સાપ નામના આ નાના અને શરમાળ સરિસૃપો જ્યારે મુશ્કેલીમાં મુકાય છે ત્યારે તેઓ સામાન્ય રીતે ચાલવાને બદલે હવામાં ફાસ્ટ રોલ થઈને એટલે કે કાર્ટવ્હીલ કરીને ભાગી છૂટે છે. આ અનોખી કળા પાછળનું સત્ય બહાર લાવવા માટે કરન્ટ બાયોલોજી જર્નલમાં 19 ઓક્ટોબર, 2026ના રોજ એક રિપોર્ટ પબ્લિશ કરવામાં આવ્યો છે, જેમાં આ સાપની બોડી મૂવમેન્ટના ચોંકાવનારા ખુલાસા થયા છે.
આ અનોખા સ્ટડી માટે રિસર્ચર્સે મલેશિયા અને જાપાનના નિષ્ણાતો સાથે મળીને Pseudorabdion જિનસના 13 ડ્વાર્ફ રીડ સાપ પર પ્રયોગ કર્યો હતો. આ સાપ 2.2 મીટરના નેરો ટ્રેક પર કઈ રીતે ભાગે છે તે નોંધવા માટે ઉપર અને બાજુમાં કેમેરા ગોઠવવામાં આવ્યા હતા. ફૂટેજમાં જોવા મળ્યું કે સાપ પહેલા પોતાના શરીરને C શેપમાં વાળીને માથું ઊંચું કરે છે, અને પછી હવામાં છલાંગ લગાવીને રોલ થવા લાગે છે. આ દરમિયાન આશ્ચર્યજનક વાત એ રહી કે આટલી સ્પીડમાં ગોળ ફરવા છતાં સાપનું માથું એકદમ સ્ટેબલ રહે છે. આ સાપ સેકન્ડના 5.6 થી 12.1 ફૂટ એટલે કે કલાકના 6 થી 13 કિલોમીટરની સ્પીડ પકડી શકે છે, જે તેમની સામાન્ય સરકવાની સ્પીડ કરતાં લગભગ 4 ગણી વધારે ઝડપી છે.
પાનખરના કચરા અને લાકડા નીચે છુપાઈને રહેતા આ નાના સાપ માટે આ કળા શત્રુઓથી બચવા માટે કોઈ જાદુથી કમ નથી. અચાનક થતી આ હિલચાલથી પ્રિડેટર્સ એટલે કે શિકારી પ્રાણીઓ પણ કન્ફ્યુઝ થઈ જાય છે અને સાપને સેફ જગ્યાએ પહોંચવા માટે પૂરતો સમય મળી જાય છે. જો કે, આ અનોખી મૂવમેન્ટ પાછળ સાપ કેટલી એનર્જી વેડફતો હશે અને આ ટેકનિક કુદરતી વાતાવરણમાં કેટલી કારગર સાબિત થાય છે તે જાણવા માટે હજુ વધુ રિસર્ચ ચાલી રહ્યા છે, પરંતુ આ સ્ટડીએ સાબિત કરી દીધું છે કે જીવ બચાવવા માટે પ્રકૃતિએ નાના જીવોને પણ ગજબની ગિફ્ટ આપી છે.
