કેરળના કોચીમાં ચેરનાલ્લુર વિસ્તારમાં કન્ટેનર રોડ પર રાત્રે અંદાજે 2.20 વાગ્યે એક ફાસ્ટ મર્સિડીઝ બેન્ઝ કારે પાછળથી સ્કૂટરને ਜ਼ੋਰਦાર ટક્કર મારી હતી. આ અકસ્માતમાં 55 વર્ષના સ્કૂટર સવાર અને નાની હોટલ ચલાવતા જયબાલકૃષ્ણન ગંભીર રીતે ઘાયલ થયા હતા, જેમણે હોસ્પિટલ લઈ જતા સમયે દમ તોડી દીધો હતો. આ લક્ઝરી કાર એક એડિશનલ ડિસ્ટ્રિક્ટ જજના 17 વર્ષીય સગીર પુત્ર દ્વારા ચલાવવામાં આવી રહી હોવાનું સામે આવ્યું હતું, જેને કારણે આ મામલો સમગ્ર દેશમાં ચર્ચાનો વિષય બન્યો છે. અકસ્માત બાદ પીડિત પરિવાર દ્વારા પોલીસ તપાસ સામે ગંભીર સવાલો ઉઠાવવામાં આવ્યા હતા અને ન્યાયની માંગ કરવામાં આવી હતી.
શરૂઆતમાં પોલીસે આ કેસમાં માત્ર બેદરકારીથી મોતનો સામાન્ય ગુનો નોંધીને મામલો ઠંડો પાડવાનો પ્રયાસ કર્યો હતો, પરંતુ કાર અતિશય ઓવરસ્પીડમાં હોવાના પુરાવા મળતા અને પીડિત પરિવારના ઉગ્ર વિરોધ બાદ કેસમાં કલમ બદલીને કલ્પેબલ હોમિસાઈડ એટલે કે ગેરઇરાદ્યુક્ત હત્યાનો ગંભીર ગુનો નોંધવામાં આવ્યો હતો. આ પ્રકરણમાં ગંભીર બેદરકારી દાખવનાર સ્ટેશન હાઉસ ઓફિસર અને સબ-ઇન્સ્પેક્ટર વિશ્વજીત વી. એસ., સર્કલ ઇન્સ્પેક્ટર શ્યામ કુમાર કે. એસ., ગ્રેડ આસિસ્ટન્ટ સબ-ઇન્સ્પેક્ટર મનોજ કે. ટી. અને સિનિયર સિવિલ પોલીસ ઓફિસર અરુણ જોશી સહિત કુલ 4 પોલીસકર્મીઓને સસ્પેન્ડ કરી દેવામાં આવ્યા છે. જ્યારે કમિશનર કલિરાજ મહેશ કુમારની જગ્યાએ આર. નિશાંથિનીને કોચી સિટીના નવા પોલીસ કમિશનર તરીકે નિયુક્ત કરવામાં આવ્યા છે.
ઘટના બાદ સગીર આરોપીને જ્યુવેનાઈલ જસ્ટિસ બોર્ડ સમક્ષ રજૂ કરવામાં આવ્યો હતો જ્યાંથી તેને જામીન મળી ગયા હતા, પરંતુ પોલીસે હવે કોર્ટમાં જામીન રદ કરવાની અરજી દાખલ કરી છે. પોલીસની પ્રાથમિક તપાસમાં સગીરે દારૂ પીધો ન હોવાનું સામે આવ્યું છે છતાં તેના બ્લડ સેમ્પલ વધુ તપાસ માટે લેવામાં આવ્યા છે. પીડિત પરિવાર હવે આરોપી સગીરના પિતા કે જેઓ ખુદ જજ છે, તેમની સામે પણ કાનૂની કાર્યવાહી કરવાની માંગ કરી રહ્યો છે જેથી આ કેસમાં આગામી દિવસોમાં વધુ વળાંક આવવાની પૂરી શક્યતા છે.
