સુરતના કાપડ માર્કેટમાં વેપારીઓને નિશાન બનાવતી એક રીઢા ઠગ ટોળકીનો પર્દાફાશ થયો છે. સરોલી વિસ્તારમાં કાપડનો વેપાર કરતા એક સ્થાનિક વેપારી સાથે સુનિયોજિત કાવતરું રચીને 10 લાખ રૂપિયાથી વધુની કિંમતનો ગ્રે અને ફિનિશ્ડ કાપડનો માલ ખરીદીને પેમેન્ટ ચૂકવ્યા વગર રફુચક્કર થઈ જનાર એક દંપતી પોલીસના શિકંજામાં આવી ગયું છે. સરોલી પોલીસે બાતમી અને ટેકનિકલ સર્વેલન્સના આધારે મહારાષ્ટ્રના થાણે ખાતેથી આ બંને આરોપીઓને દબોચી લીધા છે, જેમાં વિશાલ પાંડુરંગ શીર્કે અને તેની પત્ની અંજલી વિશાલ શીર્કેનો સમાવેશ થાય છે.
આ ઠગ દંપતીએ ખૂબ જ ચતુરાઈથી વેપારીઓ સાથે વિશ્વાસ કેળવવાનો ખેલ રમીને આખું કાવતરું રચ્યું હતું. આરોપીઓએ એક સ્થાનિક કાપડ બ્રોકર મારફતે સરોલીના વેપારી સાથે સંપર્ક સાધ્યો હતો અને મીઠી મીઠી વાતો કરીને પોતાને મોટા વેપારી તરીકે ઓળખાવ્યા હતા. શરૂઆતમાં તેમણે નાના ઓર્ડર મૂકીને તેનું પેમેન્ટ સમયસર સીધું બેંક ખાતામાં જમા કરાવી દીધું હતું, જેથી વેપારીનો તેમના પર સંપૂર્ણ ભરોસો બેસી ગયો. આ જ વિશ્વાસનો ગેરલાભ ઉઠાવીને દંપતીએ એકસાથે 10 લાખથી વધુની કિંમતનો કાપડનો માલ ઉધારીમાં મેળવી લીધો હતો, પરંતુ જ્યારે રૂપિયા ચૂકવવાનો સમય આવ્યો ત્યારે બહાનાબાજી કરીને પોતાના મોબાઈલ ફોન સ્વિચ ઓફ કરી દીધા હતા અને સુરત છોડીને ભાગી છૂટ્યા હતા.
વેપારી દ્વારા સરોલી પોલીસ સ્ટેશનમાં લેખિત ફરિયાદ નોંધાવ્યા બાદ પોલીસે તાત્કાલિક ગુનો દાખલ કરીને તપાસનો ધમધમાટ શરૂ કર્યો હતો. પોલીસની ટીમે આરોપીઓના મોબાઈલ લોકેશન અને બાતમીદારોની મદદથી મુંબઈ નજીક આવેલા થાણેમાં દરોડો પાડીને બંને આરોપીઓની ધરપકડ કરી લીધી છે અને તેમને સુરત લાવવામાં આવ્યા છે. હાલ પોલીસ આ ઠગ દંપતીએ સુરત કાપડ માર્કેટના અન્ય કોઈ વેપારીઓને પણ આ જ પ્રકારે શિકાર બનાવ્યા છે કે કેમ તે બાબતની ઊંડાણપૂર્વક તપાસ કરી રહી છે અને વધુ પૂછપરછ માટે તેમના રિમાન્ડ મેળવવાની તજવીજ હાથ ધરી છે.
