ગુજરાતમાં હાલ અનોખી મિશ્ર ઋતુ જોવા મળી રહી છે જ્યાં નાગરિકોને એક જ દિવસમાં ગુલાબી ઠંડી, બળતરા કરતી ગરમી અને રાત્રે ઠંડક એમ ત્રણેય ઋતુનો અહેસાસ થઈ રહ્યો છે. રાજ્યમાં હાલ 15થી 20 કિલોમીટર પ્રતિ કલાકની ઝડપે પવનો ફૂંકાઈ રહ્યા છે અને મહત્તમ તાપમાન 38 ડિગ્રી સેલ્સિયસ સુધી પહોંચવાની શક્યતા છે. વહેલી સવારે અનેક વિસ્તારોમાં ધુમ્મસની ચાદર પણ જોવા મળી રહી છે, ત્યારે આવતીકાલથી હવામાન વિભાગ દ્વારા રાજ્યના કેટલાક ભાગોમાં વરસાદ પડવાની આગાહી કરવામાં આવી છે જેને કારણે વાતાવરણમાં વધુ પલટો આવી શકે છે.
હવામાન વિભાગની આગાહી મુજબ ખાસ કરીને દક્ષિણ ગુજરાતના નવસારી, વલસાડ, દમણ તેમજ દાદરા અને નગર હવેલી અને સૌરાષ્ટ્રના અમરેલી અને ભાવનગર જિલ્લામાં આગામી બે દિવસ હળવાથી મધ્યમ વરસાદી ઝાપટાં પડી શકે છે. તાપમાનની વિગતો જોઈએ તો ગઈકાલે કચ્છના નલિયામાં સૌથી ઓછું 18.6 ડિગ્રી તાપમાન નોંધાયું હતું, જ્યારે રાજકોટમાં સૌથી વધુ 39.3 ડિગ્રી તાપમાન રહ્યું હતું. આ ઉપરાંત અમદાવાદમાં મહત્તમ તાપમાન 36.1 ડિગ્રી અને લઘુતમ તાપમાન 22.4 ડિગ્રી નોંધાયું હતું જ્યારે ભુજમાં 38, સુરતમાં 37.5, સુરેન્દ્રનગરમાં 37.3, ગાંધીનગરમાં 36.5, વડોદરામાં 36.2 અને ભાવનગરમાં 35.8 ડિગ્રી સરેરાશ મહત્તમ તાપમાન નોંધાયું હતું.
આગામી સમયની સ્થિતિ જોઈએ તો રાજ્યના મોટાભાગના વિસ્તારોમાં હાલ વાતાવરણ સુકુ રહેશે પરંતુ 31 ઓક્ટોબર બાદ અમદાવાદ સહિતના વિસ્તારોમાં રાત્રિના લઘુતમ તાપમાનમાં ક્રમશઃ ઘટાડો નોંધાવાની અને ઠંડીનો जोर વધવાની સંભાવના છે. એક તરફ વરસાદની આગાહી અને બીજી તરફ વધતી ગરમી વચ્ચે નાગરિકો આ બદલાતા હવામાનનો સામનો કરી રહ્યા છે, ત્યારે આગામી દિવસોમાં ઠંડીનું પ્રમાણ કેવું રહે છે તેના પર સૌની નજર રહેશે.
