બુધવારે આંધ્ર પ્રદેશના દરિયાકાંઠે અત્યંત ભયાનક એવા અરનાબ સાયક્લોનનું લેન્ડફોલ શરૂ રહ્યું હતું, જેને ધ્યાનમાં રાખીને વેધર ડિપાર્ટમેન્ટે કિનારે ભારે તકેદારીના આદેશ આપ્યા છે. આ વાવાઝોડાનું કેન્દ્ર દરિયાકાંઠાની ખૂબ જ નજીક સ્થિત છે અને આગામી કલાકમાં આખી પ્રક્રિયા પૂર્ણ થવાની સંભાવના છે. સાયક્લોનની અસરના ભાગરૂપે કાકીનાડા, વિશાખાપટ્ટનમ, અનાકાપલ્લી અને કોનાસીમા સહિતના અનેક જિલ્લાઓમાં ધોધમાર વરસાદ સાથે જોરદાર પવનો ફૂંકાયા છે, જેના કારણે અનેક જગ્યાએ વૃક્ષો ધરાશાયી થવાની ઘટનાઓ પણ સામે આવી છે.
વેધર ડિપાર્ટમેન્ટના જણાવ્યા અનુસાર, સાયક્લોનનું કેન્દ્ર પશ્ચિમ-મધ્ય બંગાળની ખાડીમાં આંધ્ર પ્રદેશના દરિયાકાંઠે અક્ષાંશ 16.4 ડિગ્રી ઉત્તર અને રેખાંશ 82.0 ડિગ્રી પૂર્વ આસપાસ નોંધાયું હતું. આ સિસ્ટમ નરસપુરથી 30 કિલોમીટર પૂર્વમાં અને કાકીનાડાથી 70 કિલોમીટર દક્ષિણ-પશ્ચિમમાં સક્રિય રહીને ઉત્તર-પશ્ચિમ દિશા તરફ આગળ વધી રહી છે. આ તોફાન દરમિયાન પવનની મહત્તમ ગતિ 135 કિલોમીટર પ્રતિ કલાક સુધી પહોંચી શકે છે અને તેના સપાટા 150 કિલોમીટર પ્રતિ કલાક સુધી જઈ શકે છે તેવી ચેતવણી આપવામાં આવી છે.
ભારે વરસાદ અને દરિયાના પાણી નીચાણવાળા વિસ્તારોમાં ફરી વળતાં કાકીનાડા સહિતના વિસ્તારોમાં પૂર જેવી સ્થિતિ સર્જાઈ હતી, જ્યાં બોમ્બે કટ્ટા વિસ્તારમાં ફસાયેલા 4 લોકોને પોલીસ દ્વારા રેસ્ક્યુ કરીને સુરક્ષિત બહાર કાઢવામાં આવ્યા હતા. આ ઉપરાંત કાકીનાડા એન્કરેજ પોર્ટ પાસે આવેલા ગોડાઉનમાં પણ કેટલાક લોકો ફસાયા હતા, જેમણે રેસ્ક્યુ ટીમની મદદ લીધી હતી. પ્રશાસન અને પોલીસ દ્વારા નાગરિકો માટે સેફ્ટી એડવાઇઝરી જારી કરવામાં આવી છે, જેમાં અત્યંત જરૂર ન હોય તો ઘરની બહાર ન નીકળવાની અને ઈમરજન્સી માટે ડાયલ 112 અથવા પોલીસ કંટ્રોલ રૂમનો સંપર્ક કરવાની અપીલ કરવામાં આવી છે.
