મેઘરજ તાલુકાના ઈસરી પોલીસ સ્ટેશન વિસ્તારમાં આવેલ વડથલી ગામની સીમમાંથી પોલીસે ગત રાત્રે દારૂની હેરાફેરીનો પર્દાફાશ કર્યો છે. અરવલ્લી જિલ્લા LCB પોલીસ ટીમ જ્યારે આ વિસ્તારમાં પેટ્રોલીંગમાં હતી, ત્યારે તેમને ચોક્કસ બાતમી મળી હતી કે રાજસ્થાન તરફથી કેટલાક શખ્સો બાઈક ઉપર વિદેશી દારૂનો જથ્થો લઈને વડથલીથી હનુમાન કંપા તરફના રસ્તે આવી રહ્યા છે. આ બાતમીના આધારે પોલીસે તાત્કાલિક હરકતમાં આવીને વડથલી ગામની સીમમાં વોચ ગોઠવી દીધી હતી અને શંકાસ્પદ બાઈકો આવતાની સાથે જ તેને કોર્ડન કરીને ઝડપી લીધી હતી.
આ સફળ રેડ દરમિયાન પોલીસે રાજસ્થાન તરફથી દારૂની હેરાફેરી કરતી કુલ 4 બાઈકો કબજે કરી હતી, જેમાંથી 2 બાઈક તો કોઈ પણ જાતના નંબર વગરની શંકાસ્પદ હાલતમાં મળી આવી હતી. પોલીસે બાઈક ઉપર બાંધેલા કોથળા ખોલીને તપાસ કરતાં તેમાંથી વિદેશી દારૂની કુલ 419 નંગ બોટલો મળી આવી હતી. જપ્ત કરવામાં આવેલા આ દારૂ અને બાઈક સહિતનો કુલ મુદ્દામાલ રૂ. 1,12,350 ની કિંમતનો હોવાનું સામે આવ્યું છે. પોલીસે સ્થળ પરથી જ 5 ઈસમોને દારૂના જથ્થા સાથે ઝડપી પાડ્યા હતા, જેઓ પોલીસને જોઈને ભાગવાનો પ્રયાસ કરી રહ્યા હતા પરંતુ પોલીસની સતર્કતાથી પકડાઈ ગયા હતા.
પોલીસે પકડાયેલા તમામ 5 આરોપીઓ સામે ઈસરી પોલીસ સ્ટેશનમાં ગુનો નોંધીને કાયદેસરની અટકાયત કરી છે. પ્રાથમિક પૂછપરછ અને તપાસ દરમિયાન આ સમગ્ર દારૂના નેટવર્કમાં સંડોવાયેલા અન્ય 2 ઈસમોના નામ પણ સામે આવ્યા છે, જેને પોલીસે વૉન્ટેડ જાહેર કર્યા છે. આ મામલે પોલીસે પકડાયેલા શખ્સોની કડક પૂછપરછ શરૂ કરી છે કે આ દારૂ તેઓ કયા શખ્સ પાસેથી લાવ્યા હતા અને કઈ જગ્યાએ પહોંચાડવાના હતા, જેથી આ કેસમાં વધુ મોટા ખુલાસા થઈ શકે.
