ઉંઝા એસ.ટી. બસ ડેપો વિસ્તારમાં તે સમયે અચાનક જ ભારે અફરાતફરીનો માહોલ સર્જાઇ ગયો જ્યારે એક યુવકને ગંભીર હાર્ટ એટેક આવ્યો હતો. આવી કટોકટીની અને જીવસાઇનની ઘડીએ ત્યાંથી પસાર થઈ રહેલી 112 જનરક્ષકની ટીમ વ્હારે આવી હતી. આ ઘટનામાં પોલીસ જવાનોએ જરાય સમય બગાડ્યા વગર ત્વરિત કાર્યવાહી કરીને માનવતાનું ઉત્તમ ઉદાહરણ પૂરું પાડ્યું હતું અને યુવકને તાત્કાલિક હોસ્પિટલ પહોંચાડવાની વ્યવસ્થા કરી હતી.
આ સમગ્ર ઘટનામાં ઉંઝા વિસ્તારમાં 112 જનરક્ષક ગાડીમાં ફરજ બજાવતા પોલીસ કોન્સ્ટેબલ નિકુલ ભુરાભાઈ રબારી અને હાર્દિકકુમાર દિલીપભાઈ રાવત બસ સ્ટેશન વિસ્તારમાં રૂટીન પેટ્રોલિંગ પર હતા. યુવકને હૃદયરોગના હુમલાની ગંભીર અસર થયાની જાણ થતાં જ આ બંને જવાનો સેકન્ડનો પણ વિલંબ કર્યા વગર તરત જ મદદ માટે દોડી આવ્યા હતા. યુવકની નાજુક હાલત જોઈને બંને જવાનોએ પોતાની ગાડીમાં જ તેને તુરંત નજીકની હોસ્પિટલ તરફ દોડાવી મૂક્યો હતો.
પોલીસ જવાનોની સજાગતાને કારણે માત્ર 2 મિનિટના ટૂંકા સમયમાં જ યુવકને હોસ્પિટલ પહોંચાડી દેવામાં આવ્યો હતો, જ્યાં ડોક્ટરોએ તરત જ તેની સારવાર શરૂ કરી દીધી હતી. મેડિકલ સાયન્સ પણ માને છે કે હાર્ટ એટેક જેવા કિસ્સાઓમાં જો ગોલ્ડન અવરમાં એટલે કે સમયસર સારવાર મળી જાય તો દર્દીનો જીવ બચી જવાની શક્યતા વધી જાય છે. આ જવાનની સમયસૂચકતા અને ફરજ પ્રત્યેની નિષ્ઠાને કારણે આજે એક યુવકનો જીવ બચી ગયો છે, અને ચારેય બાજુ આ પોલીસકર્મીઓની કામગીરીની પ્રશંસા થઈ રહી છે.
