મધ્ય પૂર્વમાં ફરી એકવાર તણાવ વધતો જોવા મળી રહ્યો છે, જ્યાં ઈરાન સમર્થિત હુતી વિદ્રોહીઓએ મંગળવારે સાઉદી અરેબિયાના મહત્વના ઠેકાણાઓને નિશાન બનાવ્યા હોવાનો મોટો દાવો કર્યો છે. હુતી વિદ્રોહીઓના સૈન્ય પ્રવક્તા યહ્યા સારીના જણાવ્યા અનુસાર, તેમની સશસ્ત્ર સેનાઓએ સાઉદી અરેબિયાની રાજધાની રિયાધમાં આવેલા રક્ષા મંત્રાલય પર બેલિસ્ટિક મિસાઈલથી હુમલો કર્યો છે અને તેમનું નિશાન એકદમ ચોક્કસ રહ્યું હતું. આ હુમલા પહેલા રિયાધ શહેરમાં દિવસ દરમિયાન જોરદાર વિસ્ફોટોના અવાજો પણ સાંભળવામાં આવ્યા હતા, જેણે સ્થાનિક નાગરિકોમાં ચિંતા વધારી દીધી છે.
આ હુમલાની શ્રેણીમાં માત્ર રક્ષા મંત્રાલય જ નહીં, પરંતુ ખમીસ મુશૈતનું એક એરબેઝ, નજરાન એરપોર્ટ પર હાજર બે સૈન્ય વિમાનો અને સાઉદી અરેબિયાની સૌથી મોટી 'રાસ તાનુંરા' ઓઇલ રિફાઇનરીને પણ નિશાન બનાવવામાં આવ્યા છે. હોર્મુઝની સમુદ્રધૂનીની પશ્ચિમે ખાડીના કિનારે આવેલી આ ઓઇલ રિફાઇનરી પર થયેલા હુમલાના કારણે ત્યાં ભીષણ આગ લાગી ગઈ હતી, જેમાં એક શિપિંગ ટર્મિનલ પણ પ્રભાવિત થયું હોવાનું સામે આવ્યું છે. અગાઉ સાઉદી અરેબિયા દ્વારા હુતીઓ દ્વારા દાગવામાં આવેલી બે મિસાઈલોને હવામાં જ તોડી પાડવામાં આવી હોવાના દાવા વચ્ચે આ મોટા હુમલાની ઘટના સામે આવી છે.
પ્રતિદિન 550000 બેરલની માતબર ક્ષમતા ધરાવતી આ રાસ તાનુંરા રિફાઇનરી અગાઉ પણ યુદ્ધના શરૂઆતના મહિનાઓમાં એહતિયાતી પગલા રૂપે થોડા સમય માટે બંધ રાખવામાં આવી હતી. જોકે, આ તાજા હુમલાઓ અને વિસ્ફોટો અંગે અત્યાર સુધી સાઉદી અરેબિયાના અધિકારીઓ કે સરકાર તરફથી કોઈ પણ પ્રકારની સત્તાવાર પુષ્ટિ કરવામાં આવી નથી. આ ઘટનાક્રમ બાદ આંતરરાષ્ટ્રીય સ્તરે ઓઇલ માર્કેટ અને સુરક્ષાને લઈને ચર્ચાઓ તેજ થઈ ગઈ છે અને આગામી દિવસોમાં આ ક્ષેત્રની સ્થિતિ પર કી નજર રહેશે.
